مۇحتار شاحانوۆقا ماحمۇت قاشقاري سىيلىعى بەرىلدى

استانا. قازاقپارات - ءبىراز ۋاقىت بۇرىن باسپا ءسوز بەتتەرىندە پاكستان يسلام رەسپۋبليكاسىنىڭ پرەزيدەنتى مامنۋن حۋسەين مىرزانىڭ قازاقتىڭ اتاقتى اقىنى، بەلگىلى قوعام قايراتكەرى مۇحتار شاحانوۆقا كۇللى مۇسىلمان الەمىنىڭ جوعارعى سىيلىعىن تابىس ەتكەنى تۋرالى قۋانىشتى حابار جاريالانىپ ەدى.

جۋىردا ءازىربايجان رەسپۋبليكاسىنىڭ استاناسى باكۋ قالاسىندا ءازىربايجان- تۇركيا قوعامىنىڭ (ATEV) بەكىتكەن ماحمۇت قاشقاري اتىنداعى تۇركى الەمىنىڭ حالىقارالىق سىيلىعى تۇڭعىش رەت م. شاحانوۆقا سالتاناتتى تۇردە تابىس ەتىلدى.

 م. شاحانوۆتىڭ ءازىربايجان رەسپۋبليكاسىندا بولۋى قۇرمەتىنە مەملەكەتتىك تەلەارنادان ەكى دۇركىن،  ءبىر رەت ءبىر جارىم ساعات، ەكىنشىسىندە قىرىق بەس مينۋت تىكەلەي ەفير ۇيىمداستىرىلدى.

بۇل شارا اقىنعا دەگەن ءازىربايجان وقىرماندارىنىڭ ىستىق ىقىلاسىن ايگىلەسە كەرەك. تىكەلەي ەفيردە اقىن الەمنىڭ كوپتەگەن مەملەكەتتەرىندە ماتەريالدىق بايلىقتىڭ، سپورتتىڭ، جەڭىل اندەردىڭ ءبىرىنشى قاتارعا شىعىپ، ادامدى ادامي بيىككە كوتەرەتىن رۋحاني قۇندىلىقتاردىڭ ەڭ كەيىنگى قاتارعا ىسىرىلعانى تۋرالى ايتتى.

ءبىر كەزدە شىڭعىس ايتماتوۆ ەكەۋى بىرلەسىپ جازعان «قۇز باسىنداعى اڭشىنىڭ زارى» (عاسىر ايىرىعىنداعى سىرلاسۋ) اتتى كىتاپتا وزبەك باۋىرلار اراسىندا تۋعان اعاسىنىڭ قىزى تۋعان ءىنىسىنىڭ بالاسىنا تۇرمىسقا شىعا بەرەتىندىگىن، مۇنداي ارەكەتتەردىڭ ادامي بولمىسقا ەداۋىر دەڭگەيدە زالالى بولاتىنىن، ءتىپتى ءبىر قىرعىز عالىمىنىڭ ادام تۇگىلى مالدىڭ ءوزى ءتورت ۇرپاققا دەيىن قوسىلماۋى كەرەكتىگىن دالەلدەگەنى جايلى اڭگىمەلەدى.

سونىمەن قاتار م. شاحانوۆ «قۇز باسىنداعى اڭشىنىڭ زارىن» وزبەكستان رەسپۋبليكاسىنىڭ پرەزيدەنتى يسلام كاريموۆتىڭ وقىپ، ايتماتوۆ ەكەۋىمەن ارنايى جولىققانىن، كەيىننەن ي. كاريموۆتىڭ وزبەك باۋىرلار اراسىندا وسى قالىپتاسقان داستۇرگە قارسى ارنايى زاڭ شىعارتقانىن ايتتى.

تىكەلەي ەفيرگە قاتىسىپ وتىرعان ءازىربايجاننىڭ بەلگىلى اقىنى، پارلامەنت دەپۋتاتى سابىر رۇستەمحانلى وسىنداي ءداستۇردىڭ ءازىربايجان ۇلتىندا دا بار ەكەنىن، كەزىندە ايتماتوۆ پەن شاحانوۆ كوتەرگەن ماسەلە توڭىرەگىندە ءازىربايجان ەلىندە دە ارنايى زاڭ قاجەتتىگى تۋرالى، وسى ماسەلەگە بۇدان بىلاي ءوزىنىڭ دە بەل شەشە ارالاساتىندىعىن مالىمدەدى.

ءازىربايجان باۋىرلار م. شاحانوۆقا سوناۋ سوۆەت وداعى سالتانات قۇرىپ تۇرعان كەزەڭدە ناۋرىز مەرەكەسىن تىرىلتكەنى ءۇشىن جانە وداقتاس رەسپۋبليكالاردىڭ تىلدەرىنە مەملەكەتتىك مارتەبە بەرىلۋىنە سەبەپكەر بولعانى ءۇشىن اقىنعا العىس سەزىمىن ءبىلدىردى.

م. شاحانوۆ تۇركى الەمى زيالىلار وداعىنىڭ ءتوراعاسى رەتىندە ءازىربايجان رەسپۋبليكاسىندا زيالىلار وداعىنىڭ بولىمشەسىن اشتى. بولىمشە باسشىسى بولىپ ءازىربايجان پارلامەنتىنىڭ دەپۋتاتى، بەلگىلى اقىن س. رۇستەمحانلى بەكىتىلدى.

ن. ءجۇسىپباي.