09:53, 16 - ءساۋىر 2015 | GMT +5
سەرىك احمەتوۆ وزىنە تاعىلعان ايىپپەن تانىسىپ ۇلگەرمەي جاتىر
استانا. قازاقپارات - سەرىك احمەتوۆتىڭ ءۇي قاماقتا وتىرۋ مەرزىمى تاعى ءبىر ايعا ۇزارتىلدى. 150 تومدىق قىلمىستىق ىسپەن تانىسىپ شىعۋعا وعان 18- مامىرعا دەيىن ۋاقىت بەرىلىپ وتىر دەپ حابارلايدى ك ت ك ارناسى.
ەكس-پرەمەرگە اسا ءىرى كولەمدە پارا الدى، مەملەكەت مۇلىگىن تالان تاراجعا سالدى جانە لاۋازىمىن اسىرا پايدالاندى دەگەن ايىپتار تاعىلعان. بۇل قىلمىستىڭ بارلىعىن احمەتوۆ قاراعاندى وبلىسى اكىمى قىزمەتىندە بولعاندا جاساپتى.
ياعني يندۋستريالىق پاركتىڭ كارىز جۇيەسىنىڭ قۇرلىسىنا بولىنگەن مەملەكەتتىڭ ميللياردتارىنا اۋىز سالعان. جەڭ ۇشىنان جالعاسقان قىلمىسقا قاتىسى بار تاعى 20 شاقتى شەندى قازىر تەرگەۋ اباقتىسىندا وتىر.
ولاردىڭ اراسىندا قاراعاندى وبلىسى مەن قالاسىنىڭ بۇرىنعى اكىمدەرى باۋىرجان ابدىشيەۆ پەن مەيرام سماعۇلوۆ جانە يندۋستريالىق پاركتىڭ بۇرىنعى باسشىسى اناتولي ەسسە بار. ولار دا، ىشىندە وزدەرىنىڭ اتتارى بار سول 150 تومدىق ىسپەن تانىسۋدا.
«ك ت ك» ارناسى
