ۇلتىم ازەربايجان بولسا دا، تۋعان جەرىم، تۋعان ەلىم قازاقستاندى جان- تانىممەن سۇيەمىن - ينشاللاح گۋربانوۆ

استانا. قازاقپارات - ۇلتىم ازەربايجان بولسا دا، مەن تۋعان جەرىم، تۋعان ەلىمدەي بولىپ كەتكەن كەڭ بايتاق قازاقستاندى جان- تانىممەن سۇيەمىن.

 بۇل تۋرالى «قازاقپارات» ح ا ا- ءنىڭ تىلشىسىنە اقمولا وبلىسى ەگىندىكول اۋدانى ورتالىعىنداعى №2 ورتا مەكتەپتىڭ فيزيكا- ماتەماتيكا ءپانىنىڭ مۇعالىمى ينشاللاح گۋربانوۆ ايتتى.

ونىڭ ايتۋىنشا، قازاقستان حالقى اسسامبلەياسىنىڭ 20 جىلدىعى - بۇل ەلىمىزدەگى ءتۇرلى ۇلت وكىلدەرىنىڭ بىرلىك پەن كەلىسىم جانە دوستىقتى نىعايتۋ باعىتىندا قول جەتكىزىپ وتىرعان باعا جەتپەس بايلىعى بولىپ سانالادى.

 «ەگەر اۋىزبىرشىلىگى مىقتى ەل بولساق، ءبىز باعىندىرمايتىن بەلەس جوق. الار اسۋىمىز كوپ بولسا، قازاقستان دامىعان وتىز مەملەكەتتىڭ قاتارىنا ەنىپ، الپاۋىت ەلدەرمەن تەرەزەسى تەڭەلەتىنى ءسوزسىز. مەن ءوز باسىم سوناۋ 1984 - جىلدان وسى ەلدىڭ اۋاسىمەن تىنىستاپ، جەرىن قۇت مەكەن ەتىپ تۇرىپ جاتىرمىن. بۇل كۇندە №2 ەگىندىكول ورتا مەكتەبىندە فيزيكا- ماتەماتيكا پاندەرىنەن ساباق بەرەمىن. ءاربىر شاكىرتىمە وتانىمىزدىڭ ابىرويلى ازاماتى بولۋدىڭ اسقان مارتەبە ەكەنىن ايتىپ وتىرامىن. مەنىڭ وقۋشىلارىم ەشقاشان ۇلتقا، تىلگە، دىنگە بولىنگەن ەمەس. جالپى، ىنتىماق پەن بەرەكە وتباسىنان، مەكتەپتەن باستاۋ الۋى ءتيىس دەپ ويلايمىن. ءبىر شاڭىراق استىندا تاتۋلىقتا، دوستىقتا ءومىر ءسۇرۋىمىز كەرەك. ونسىز قوعامنىڭ بەرىكتىگى ساقتالمايدى.

 ءار حالىقتىڭ ءوز انا ءتىلى بولادى. قازاق ءتىلى ارقىلى سول ۇلتتىڭ تاريحىنا قانىعاسىڭ. وسى كۇنگە دەيىن انا ءتىلىنىڭ بايلىعى، سارى دالاسىنىڭ كەڭدىگى، قوناقجاي كەڭپەيىلدىلىگى مەنى تاڭ قالدىرىپ كەلەدى. ءار حالىق ءوز ءتىلى ارقىلى الەمدى، دۇنيەنى، ءومىردىڭ قۇندى تاعىلىمدارىن تانيدى ەمەس پە؟ وسى ورايدا، قازاقستاندا تۇراتىن وزگە ۇلت وكىلدەرىنىڭ ءوز تىلدەرىندە سويلەپ، قارىم- قاتىناس جاساۋى ءۇشىن بار مۇمكىندىك جاسالىپ وتىر. وعان مەنىڭ العىسىم شەكسىز. ءبىز قازاق حالقىنىڭ بار رۋحاني قۇندىلىعى، ارداقتى اسىل ءتىلىن ءارقاشان قۇرمەت تۇتامىز. قازىرگى كۇنى مەن قازاق ءتىلىن مەڭگەرۋدەمىن جانە ءتىل ۇيرەنۋگە دەگەن قۇلشىنىسىم وزگەشە. قازاقستان - كوپ ۇلتتى مەملەكەت بولعاندىقتان، قاي ۇلتتىڭ وكىلى بولماسىن مەملەكەتتىك ءتىلدى مەڭگەرۋى پارىز دەپ ويلايمىن. ءاربىر ۇلت وسى جەردى قاسيەتتى دە كيەلى وتانىم دەپ مويىنداپ، ونىڭ گۇلدەنۋى ءۇشىن قىزمەت ەتۋى ءتيىس.

بيىلعى قازاقستان حالقى اسسامبلەياسىنىڭ 20 جىلدىعى - بۇل ەلىمىزدەگى بەيبىت ءومىر ءسۇرىپ جاتقان ءتۇرلى ۇلت وكىلدەرىنىڭ بىرلىك پەن كەلىسىم جانە دوستىقتى نىعايتۋ باعىتىندا قول جەتكىزىپ وتىرعان باعا جەتپەس بايلىعى بولىپ سانالادى.

 جىل سايىن ءبىز 1 - مامىر - ىنتىماق، بىرلىك كۇنىن بارشا حالىق بولىپ تويلايمىز. ۇلتارالىق كەلىسىم مەن تاتۋلىقتى ايعاقتايتىن مەرەكەنىڭ ماڭىزى جىل وتكەن سايىن ارتا تۇسۋدە. بارشا حالىقتى جاقىنداستىرا تۇسەتىن 1 - مامىر - ىنتىماق كۇنىن وتباسىمىزبەن اسىعا كۇتەمىز. ويتكەنى، ەتنوسارالىق بىرلىك پەن كەلىسىم بار جەردە ءارقاشان تاتۋلىق، دوستىق، اۋىزبىرشىلىك بولادى. ءبىزدىڭ بىرلىگىمىز بەن تىرلىگىمىز ماڭگىلىك.

سوندىقتان، ۇلتىم ءازىربايجان بولسا دا، مەن تۋعان جەرىم، تۋعان ەلىمدەي بولىپ كەتكەن كەڭ بايتاق قازاقستاندى جان- تانىممەن سۇيەمىن»، - دەيدى ينشاللاح گۋربانوۆ.