ەلوردادا بۇرىن- سوڭدى بولماعان ەرەكشە شەرۋ وتەدى

استانا. قازاقپارات - ەلىمىزدە بۇرىن- سوڭدى بولماعان كەڭ اۋقىمداعى اسكەري شەرۋ بيىلعى جەڭىس كۇنىندە استانا قالاسىندا وتكەلى تۇر.

 وعان قازاقستان ارمياسىنداعى ەڭ وزىق بولىمدەردەن 5000 نان اسا جاۋىنگەر مەن 220 اسكەري تەحنيكا، 75 ۇشۋ اپپاراتتارى قاتىستىرىلماقشى. بۇل جولعى شەرۋدىڭ تاعى دا ءبىر ەرەكشەلىگى بار.

 ق ر قارۋلى كۇشتەرى باس شتابى باستىعىنىڭ ورىنباسارى، گەنەرال- مايور مۇقان دۇيسەكەيەۆتىڭ حابارلاۋىنشا، مازمۇندىق يدەياسىنا قاراي پاراد تاريحي جانە زاماناۋي ەكى ءبولىمدى قۇرايدى. تارقاتىپ ايتساق، تاريحي بولىمدە 1941-1945 -جىلدارداعى سوعىس تەحنيكاسىنىڭ 36 ءتۇرى قاتىسادى. ونىڭ ىشىندە 27 اسكەري تەحنيكا مەن قارۋ- جاراق، ونىڭ ىشىندە تانك ت-34, زيل-157, زيس-2 زەڭبىرەگى جانە م-30 گاۋبيتساسى، تانىمال بم-13 رس-30 «كاتيۋشا» جانە «ماكسيم» پۋلەمەتى بار. سونداي- اق 9 ۇشۋ ا ن-2 جانە تl-2000 سىندى 9 ۇشۋ اپپاراتى استانانىڭ اسپانىندا قالىقتايدى. ال زاماناۋي بولىمدە بۇگىنگى قازاقستاندىق ارميا قارۋ- جاراعىن قۇرايتىن قارۋلار مەن اسكەري تەحنيكانىڭ ۇلگىلەرى كورسەتىلەدى. اسكەري قىزمەتشىلەر ەڭ سوڭعى ۇلگىدەگى اسكەري كيىمدەردى كيەدى.

 -  قازاقستان قارۋلى كۇشتەرىنىڭ اسكەري قىزمەتشى قىز- كەلىنشەكتەرى جەڭىستىڭ 70  جىلدىعى قارساڭىندا وتەتىن اسكەري پارادقا ەرەكشە كورىك بەرەدى، -  دەيدى گەنەرال- مايور مۇقان دۇيسەكەيەۆ.

 -  پارادقا قاتىسۋ ءۇشىن جالپى سانى 186 قىز- كەلىنشەك ىرىكتەلىپ الىندى. ولاردىڭ ىشىندە 32 اسكەري قىزمەتشى سانيتارلىق نۇسقاۋشى ۇلگىسىندە كيىنىپ، شەرۋدىڭ ۇ و س كەزەڭىندەگى تاريحي بولىمىندەگى روتا قۇرامىندا بولسا، ال قالعان 154 اسكەري قىزمەتشى پارادتىڭ قازىرگى زامانعى بولىمىندە الاڭدا قازاقستاندىق اسكەري جوعارى وقۋ ورىندارىنىڭ كۋرسانتتارىنان كەيىن جەكە جاياۋ ساپپەن ادىمدايدى. اسكەري قىز- كەلىنشەكتەر قازاقستاننىڭ ءتورت وڭىرلىك قولباسشىلىعىنان، قارۋلى كۇشتەردىڭ بارلىق تۇرلەرى مەن اسكەر تەكتەرىنىڭ اسكەري بولىمدەرىنەن، سونداي- اق قورعانىس مينيسترلىگىنىڭ ورتالىق اپپاراتىنان جينالعان.

شەرۋدىڭ ءسانىن كەلتىرەتىن ءان- جىر جاعى دا ۇمىت قالماق ەمەس. جەڭىستىڭ 70 جىلدىعى قۇرمەتىنە ارنالعان اسكەرلەر پارادىن مۋزىكالىق سۇيەمەلدەۋدى قورعانىس مينيسترلىگى قۇراما وركەسترىنىڭ 250 دەن استام اسكەري مۋزىكانتى قامتاماسىز ەتپەكشى.

 جەڭىستىڭ 70  جىلدىعى قۇرمەتىنە ارنالعان اسكەرلەر پارادىنىڭ قۇرامىنداعى كورەرمەنگە ەڭ قىزىقتى بولىگى بولاتىن ءىرى اۋقىمدى اۆيا- شوۋعا زاماناۋي اۆياتسيالىق تەحنيكانىڭ 75 بىرلىگى قاتىستىرىلادى. جالپى شەرۋگە اۋە قورعانىسى كۇشتەرىنەن 1000 عا جۋىق ادام، س-300, س-200 زەنيتتىك- زىمىران كەشەندەرى كەلەدى. ەلورداداعى قازاق ەلى الاڭىنىڭ ۇستىنەن سۋ-27, سۋ-25, ميگ-31, ميگ-29 جاۋىنگەرلىك ۇشاقتارى، مي-17, مي-171, مي-26, ەurocopter تىكۇشاقتارى، تۋ-134, تۋ-154, ان-26, ان-72, س-295 اسكەري- كولىكتىك ۇشاقتارى ۇشىپ وتەدى دەپ جوسپارلانۋدا. سونىمەن بىرگە اۋەگە تۇڭعىش رەت سۋ-30 سم جاڭا جاۋىنگەرلىك ۇشاقتارى كوتەرىلەدى.

ءدال قازىرگى ۋاقىتتا ايتۋلى شارادا ساپ تۇزەيتىن اسكەري بولىمدەردە تىنىم جوق. سول سياقتى قورعانىس مينيسترلىگى دە قازاقستان ارمياسىنىڭ ايبىنىن اسىراتىن شەرۋدى جوعارى دەڭگەيدە ءمىنسىز وتكىزۋ ءۇشىن دايىندىقتى توقتاتپاستان جۇرگىزىپ، وزگە دە ۇيىمداستىرۋ جۇمىستارىن جوسپارعا ساي اتقارىپ جاتىر.

 

بەيسەنباي داۋلەت ۇلى

«ايقىن»