تۇركيا پرەزيدەنتى قازاقستانعا جاساعان ساپارىندا تۇركىستان قالاسىنا بارادى

 استانا. قازاقپارات - رەدجەپ تايىپ ەردوعان تۇركيا پرەزيدەنتى رەتىندە قازاقستانعا جاساعان العاشقى مەملەكەتتىك ساپارىندا استانا مەن تۇركىستان قالالارىندا بولادى.

16-17 - ساۋىردەگى تۇرىك رەسپۋبليكاسىنىڭ پرەزيدەنتى ر. ت. ەردوعاننىڭ قازاقستانعا مەملەكەتتىك ساپارى جوعارى دەڭگەيدەگى ساياسي ءۇنقاتىسۋدىڭ جالعاسى بولىپ،

تاراپتاردىڭ حالىقارالىق ارەنادا ءوزارا بەلسەندى ارەكەتتەسۋى جانە ەكىجاقتى قارىم- قاتىناستاردىڭ ءارتۇرلى سالا بويىنشا ىرعاقتى دامۋى اياسىندا جۇزەگە اسىرىلماق. ساپار شەڭبەرىندە تۇركيا پرەزيدەنتى ر. ت. ەردوعان استانا مەن تۇركىستان قالالارىندا بولادى.

 قازاقستاننىڭ تۇرىك رەسپۋبليكاسىنداعى توتەنشە جانە وكىلەتتى ەلشىسى جانسەيىت تۇيمەبايەۆتىڭ ايتۋىنشا، تۇركىستاندا تۇركيا ءدىن ىستەرى باسقارماسىنىڭ قاراجاتىنا سالىنعان ۇلكەن مەشىتتىڭ، قوجا احمەت ياساۋي اتىنداعى قازاق- تۇرىك ۋنيۆەرسيتەتىنىڭ جاڭادان سالىنعان عيماراتتارىنىڭ (ۋنيۆەرسيتەتتىڭ مەديتسينالىق فاكۋلتەتى مەن ستۋدەنتتىك جاتاقحانا عيماراتتارى، نامازحانا، فۋتبول الاڭى) سالتاناتتى تۇردە اشىلۋى جوسپارلانۋدا.

تۇركىستانداعى مەشىتتىڭ ىرگەتاسى 15 جىل بۇرىن قالانعان بولاتىن. تۇركيا ءدىني ىستەر قوعامى تاراپىنان سالىنعان مەشىت 2 قاباتتى جانە 600 شارشى مەتر جابىق الاڭى بار. سىيىمدىلىعى 2 مىڭ كىسىلىك، سىرتتا ناماز وقيتىن ورنى، تومەنگى قاباتتا مادەنيەت ورتالىعى، ءبىرىنشى قاباتتا 2 ءدارىسحاناسى بار.

قازاقستان مەن تۇركيا پرەزيدەنتتەرىنىڭ تۇركىستانداعى ءىس- شاراعا قاتىسۋى ەكى ەل اراسىنداعى مادەني- گۋمانيتارلىق بايلانىستاردىڭ ودان ءارى دامۋىنا جاعداي جاسايتىنى ءسوزسىز.

تۇركيا پرەزيدەنتى ر. ت. ەردوعاننىڭ قازاقستانعا ساپارى بارىسىندا ەكى ەل پرەزيدەنتتەرىنىڭ توراعالىعىمەن جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ ەكىنشى وتىرىسى وتەدى. وتىرىس شەڭبەرىندە اعىمداعى ماسەلەلەر كوتەرىلىپ، جاڭا ماقساتتار بەلگىلەنەدى. بۇل ءوز كەزەگىندە تاراپتاردىڭ ەكىجاقتى جانە كوپجاقتى فورماتتاعى ودان ارعى ىنتىماقتاستىعىنىڭ نەگىزگى باعىتتارى ايقىندالاتىن ماڭىزدى شارا. ياعني، بۇل ەل باسشىلارىنىڭ قاتىسۋىمەن ەكىجاقتى قارىم- قاتىناستاردىڭ وزەكتى ماسەلەلەرى تولىق تالقىلانادى جانە ءتيىستى شارالار قابىلدانادى دەگەن ءسوز. ەكى ەل اراسىنداعى ءىس جۇزىندەگى قادامدار مەن جۇمىستار ءوزارا قابىلدانعان شەشىمدەر مەن كەڭەس وتىرىسىنىڭ قورىتىندىسى بويىنشا جاسالاتىن مالىمدەمەلەر اياسىندا اتقارىلادى. ەكى ەل جەتەكشىلەرىنىڭ ورتاق مالىمدەمەگە قول قويۋى مەملەكەتتەر اراسىنداعى ىقپالداستىقتىڭ جۇيەلەنە تۇسۋىنە ىقپال ەتپەك، دەپ جازادى «ەگەمەن قازاقستان» باسىلىمى.