قازاقتىڭ ەڭ سۇلۋ ارۋىن ورىس ءتىلىن بىلمەگەنى ءۇشىن ايىپتاعان كىم؟
كەيبىرەۋلەر كامەرانى كورگەننەن-اق، ءسوزى قوجىراپ شىعا كەلەدى. تۋرا وسى جاعداي ءبىزدىڭ ارۋ قىزىمىزدىڭ باسىنا تۇسكەن سياقتى. ابىرجىپ، ورىس تىلىندە ويىن تولىق جەتكىزە الماعان ارۋدىڭ سۇحباتىن ك ت ك ارناسىنان ارمان يۋسۋپوۆ الادى دا، instagram.com جەلىسىنە سالىپ جىبەرەدى.
الەۋمەتتىك جەلىگە الگى بەينە سيۋجەتتى سالعانى مۇڭ ەكەن، ايدايدىڭ سۇرىنگەنىن قالايتىندار كوپ بولسا كەرەك، «قازاقستان ارۋىن» ءاپ-ساتتە-اق ءاجۋاعا اينالدىرىپ، كەلەكە-مازاق ەتە باستادى.
«سۇرىنبەيتىن تۇياق، جاڭىلمايتىن جاق بولمايدى». الايدا ايدايدىڭ ورىسشادان ءسۇرىنۋى كىنا ارتارلىق جايت پا؟ ەكىنشىدەن، الەۋمەتتىك جەلىگە بەينە سيۋجەتتى قويۋدىڭ استارىندا نە سىر جاتىر؟ ارمان يۋسۋپوۆتىڭ كوزدەگەنى نە؟ «قازاقستان ارۋىن» تۇقىرتۋ ما، الدە ەل الدىندا ماسقارالاۋ ما؟
قالاي دەگەن كۇندە دە، ارمان يۋسۋپوۆ ءوزىنىڭ ماقساتىنا جەتكەن سەكىلدى. ول ايدايدى الەۋمەتتىك جەلىگە وسىلاي كەلەكەگە سالىپ، ءوز ۇپايىن تۇگەندەيىن دەگەن شىعار، بۇدان ايداي يسايەۆانىڭ ابىرويىنا، ار-وجدانىنا نۇقسان كەلگەنىن ۇمىتقان سەكىلدى. الەۋمەتتىك جەلىنىڭ مىڭداعان تۇتىنۋشىسى پىكىر ءبىلدىرىپ، ءتىپتى، كەيبىرى قازاقستان ارۋىن ورىس ءتىلىن بىلمەگەنى ءۇشىن ايىپتاپ تا جاتتى.
بۇل ماسەلەنىڭ ەكى جاعى بار: بىرىنشىدەن، قازاق قىزىنىڭ ورىسشادان ءسۇرىنۋى - مازاق ەتەرلىك جاعداي ەمەس. ەكىنشىدەن، ەفيرگە شىعارىلماعان سۇحباتتى كوپشىلىكتىڭ الدىنا نەگە شىعاردى؟ بۇل جۋرناليست ادەبىنە جاتا ما؟
ارمان يۋسۋپوۆ ايدايدان ەفيرگە شىقپاعان سۇحباتىن الەۋمەتتىك جەلىگە سالعانى ءۇشىن كەشىرىم سۇراعان ەكەن. ءبىراق ءبىزدىڭ ويىمىزشا، قۇر كەشىرىممەن ءىس بىتپەيدى. قازاق قىزىنىڭ ابىرويىنا نۇقسان كەلىپ جاتسا، ول بارشا قازاقستاندىقتارعا سىن! قازاقتىڭ ازاماتتارى قارىنداستارىنىڭ ار-وجدانىن قورعاۋى ءتيىس.
ايدايدىڭ ءوزى الەۋمەتتىك جەلىدەگى پاراقشاسىندا: «مەنىڭ اتىما ءجۇز مىڭداعان كوممەنت جازىلدى. ولاردىڭ اراسىندا ار-نامىسىما تيەتىن سوزدەر دە بار. ءاربىر كوممەنتاريدى وقىعان سايىن جانىم تۇرشىگەدى. سوندا ەل اۋزىندا جۇرگەن ازاماتتاردىڭ ادامدىق قۇقى جوق پا؟ ءبىز دە ەت پەن سۇيەكتەن جارالعان پەندەمىز عوي. وسىنشاما ءوزىمدى قارالاپ جازىلعان سوزدەرگە كوز جۇما قاراۋىم كەرەك پە؟ مەندە دە سەزىم بار، جۇرەك بار!» دەپ جازادى.
ارۋ قىز وسىلاي دەپ شىرىلدايدى. ايدايدىڭ شىرىلىنا قۇلاق تۇرگەن كىم بار؟ جۇزدەگەن كوممەنت جازىپ، قىزىمىزدى ءاجۋالاپ جاتقاندا، اراشا تۇسكەن ءبىرىمىز جوق. كەلەكەلەپ، مازاق ەتكەندەر كىمدەر؟ تاعى دا ءوزىمىز. مۇنىڭ ءبارى شەكتەن شىققاندىق ەمەس پە؟ ءتىپتى، ناداندىقتىڭ بەلگىسى دەپ ايتۋىمىزعا دا بولادى.
بۇعان حاكىم ابايدان اسىرىپ ەشتەڭە ايتا الماس ەدىك. اباي نە دەيدى؟ «ەتىنەن وتكەن، سۇيەگىنە جەتكەن، اتادان ميراس العان، انانىڭ سۇتىمەنەن بىتكەن ناداندىق الدەقاشان ادامشىلىقتان كەتىرگەن. وزدەرىنىڭ ىرباعى بار ما، پىش-پىشى بار ما، گۋىلدەگى بار ما، دۇرىلدەگى بار ما - سونىسىنان دۇنيەدە ەشبىر قىزىقتى نارسە بار دەپ ويلامايدى، ويلاسا دا بۇرىلا المايدى، ەگەر ءسوز ايتساڭ، تۇگەل تىڭداپ تۇرا المايدى، نە كوڭىلى، نە كوزى الاڭداپ وتىرادى. ەندى نە قىلدىق، نە بولدىق!»
ناداندىق بولماسا، قازاق قىزى ءتىل بىلمەدى دەپ كەلەكە ەتۋىمىزدى نە دەۋگە بولادى؟
مەملەكەتتىك ءتىلدى بىلمەي، مىڭگىرلەپ جۇرگەن تالاي شەنەۋنىك بار. ولارعا كەلگەندە ەشكىمنىڭ ءۇنى شىقپايدى. كەلەكە دە قىلمايدى. تاۋەلسىز ەلدىڭ جاڭا تولقىنى وزگە تىلدە توتىشا سايراماعانى ءبىر ەسەپتەن ەلدىك بۋىنىمىزدىڭ بەكي تۇسكەنىنىڭ بەلگىسى ەمەس پە؟!.
ءبىز مۇنى ايدايعا ايتىلعان ورىنسىز ايقاي دەر ەدىك...
گۇلزينا بەكتاس
«ايقىن»
