كۋبانىڭ «قارا تىزىمنەن» شىعاتىن كۇنى الىس ەمەس

استانا. قازاقپارات - ا ق ش كۋبانىڭ تەرروريزمدى قارجىلاندىرۋشى ەلدەر تىزىمىندە ۇزاق ۋاقىت بولعانىن قالامايدى. بۇل - پرەزيدەنت باراك وبامانىڭ ەكى ەل اراسىنداعى قارىم-قاتىناستى جاقسى جولعا قويۋ باعىتىنداعى كىلتتى قادامى سانالماق.

وسىعان وراي اق ءۇي باسشىسى رەسمي تۇردە كۋبانى تەرروريزمگە قولداۋ تانىتىپ وتىرعان ەلدەر تىزىمىنەن الىپ تاستاۋ جونىندە كونگرەسكە ساۋال جولدادى.

اق ءۇيدىڭ ۇلتتىق قاۋىپسىزدىك كەڭەسى مالىمدەگەندەي، پرەزيدەنت مەملەكەتتىك دەپارتامەنتتىڭ جاۋابىنان كەيىن ناقتى وسىنداي شەشىمگە كەلگەن. ياعني ول بويىنشا ا ق ش وسى جىل ىشىندە كۋبانىڭ ەشقانداي دا تەررورلىق ۇيىمعا دەمەۋشىلىك جاساماعاندىعىن انىقتاپ وتىر.

ايتا كەتەيىك، كۋبانى «قارا تىزىمنەن» شىعارۋ ماسەلەسى باراك وبامانىڭ پاناما سامميتىندەگى راۋل كاسترومەن وتكىزگەن تاريحي كەزدەسۋىنەن كەيىنگى 2 كۇننىڭ ىشىندە شەشىمىن تاپقان.

كۋبا اتالعان تىزىمگە 1982-جىلى لاتىن امەريكاسىنداعى ريەۆوليۋتسيالىق ۇيىمداردى قولداپ، قارۋلاندىرعانى ءۇشىن ەنگىزىلگەن بولاتىن.

اۆتورى: جىگەر سارسەن

24.kz