قازاقستاندا ۇلتتار تەاترى قۇرىلدى

استانا. قازاقپارات - قازاقستاندىق تەاترلاردىڭ شىعارماشىلىق الەۋەتىن ارتتىرىپ، ەل مادەنيەتىنىڭ ۇيلەسىمدىلىگىن ءوزارا بايىتۋ ماقساتىندا «قازاقستان حالقى اسسامبلەياسىنىڭ الەۋمەتتىك كونسورتسيۋمى» قوعامدىق قورى «قازاقستاننىڭ ۇلتتار تەاترىن» قۇردى.

جاڭا جوبانىڭ قىزمەتى مەن ماقساتتارى تۋرالى ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا «قازاق اۋەندەرى» ا ق پرەزيدەنتى اسحات ماەميروۆ، قازاقستان ۇلتتار تەاترىنىڭ جەتەكشىسى ليۋبوۆ لي، دراماتۋرگ دۋلات يسابەكوۆ، «جاستار» تەاترىنىڭ كوركەمدىك جەتەكشىسى، ق ر ەڭبەك سىڭىرگەن قايراتكەرى نۇرقانات جاقىپباي جانە م. گوركي اتىنداعى مەملەكەتتىك ورىس دراما تەاترى اكادەمياسىنىڭ اكتەرى ليۋدميلا كريۋچكوۆا بايانداپ بەردى، دەپ حابارلانعان ورتالىق كوممۋنيكاتسيالار قىزمەتىنىڭ سايتىندا.

قازاقستاندا قازاق، ورىس، كورەي، ۇيعىر جانە نەمىس تەاترلارى بار. الايدا ءاربىر تەاتر وزدەرىنىڭ عانا ۇلتتارىنا قاتىستى قويىلىمدار قويادى. ال جاڭادان قۇرىلعان «قازاقستان ۇلتتارى تەاترى» ەلىمىزدە مەكەن ەتىپ جاتقان بارلىق ۇلت وكىلدەرىنە جاڭا قويلىمداردى ۇسىناتىن بولادى. بۇل باعىتتا قازاقستاندىق دراماتۋرگتەردىڭ بۇرىنعى نە ارنايى جازىلعان پەسالارى قويىلادى. ال قويىلىمداردى ساحنا تورىنە شىعارۋ ءۇشىن بەلگىلى، سونداي-اق زاماناۋي كوزقاراسقا ساي جاس تالانتتى رەجيسسەرلەر تارتىلادى.

«قازاقستاننىڭ ۇلتتار تەاترىندا» قويىلىمدار كورەرمەن نازارىنا بىردەن بىرنەشە تىلدە ۇسىنىلادى. مۇنداي تاجىريبە ەلىمىزدە العاش رەت قولعا الىنىپ وتىر.

ايتا كەتەيىك، تەاتر كورەرمەندەرىنە العاشقى قويىلىمى رەتىندە بەلگىلى جازۋشى جانە دراماتۋرگ دۋلات يسابەكوۆتىڭ جازعان «باقىت قۇسى» پەساسى ۇسىنۋعا دايىندالىپ جاتىر. قويىلىمدا «جاستار» تەاترىنىڭ، م. گوركي اتىنداعى مەملەكەتتىك دراما تەاترى اكادەمياسىنىڭ، مەملەكەتتىك رەسپۋبليكالىق كورەي مۋزىكالىق كومەديا تەاترى جانە ك. كۋجامياروۆ اتىنداعى مەملەكەتتىك رەسپۋبليكالىق ۇيعىر مۋزىكالىق كومەديا تەاترلارىنىڭ اكتەرلەرى ونەر كورسەتەدى.