ەرەيمەنتاۋ اۋدانىنىڭ اكىمى تاسىعان سۋدىڭ بەل ورتاسىندا قالعان
وقيعا ورنىندا قۇتقارۋشىلار بولماي، اۋدان باسشىسىنا ءۇش ساعات بويى كولىك ۇستىنە شىعىپ، وتكەن- كەتكەننەن كومەك سۇراۋعا تۋرا كەلگەن.
ەرەيمەنتاۋ اۋدانىنداعى سۋ تاسقىنى ولجاباي باتىر جانە ەركىنشىلىك اۋىلىنداعى تۇرعىنداردى اۋرە سارساڭعا سالدى. حالىقتىڭ اپاتتىق جاعدايىمەن تانىسامىن دەپ ءجۇرىپ، اۋدان اكىمىنىڭ ءوزى سۋدىڭ ورتاسىندا قالعان. نۇرا وزەنىندەگى بوگەت جارىلىپ، قۇماي وزەنىنە قۇيىلعان اعىنى قاتتى سۋ، جولدان وتپەك بولعان جول تالعامايتىن كولىكتى ەكپىنىنە سالىپ، الىپ كەتكەن. كولىگىنىڭ توبەسىنە شىعىپ، كومەك سۇراعان اكىم ەرمەك نۇعمانوۆتى بىرنەشە ۋاقىتتان سوڭ قايىقپەن كەلىپ تايباي اۋىلدىق وكرۋگىنىڭ تۇرعىندارى قۇتقارىپ العان. ءبىر قىزىعى بۇل تۋرالى توتەنشە جاعدايلار قىزمەتى حابارسىز بولىپ شىقتى.
توتەنشە جاعدايلار قىزمەتىنىڭ الدىن- الۋ جۇمىستارىن جۇرگىزگەندە سۋ تاسقىنىنان ولجاباي جانە ەركىنشىلىك اۋىلدارىنداعى ۇيلەر سۋعا كەتپەس ەدى دەيدى جەرگىلىكتى تۇرعىندار.
جاقىن ورنالاسقان وزەننىڭ تاسۋى كەسىرىنەن ولجاباي اۋلىنان 60 شاقتى ءۇي سۋ استىندا قالدى. مال شىعىنى بار.
قانات دوسپايەۆ، اقمولا وبلىسى توتەنشە جاعدايلار دەپارتامەنتى باسقارماسى باسشىسىنىڭ ورىنباسارى:
وقيعا ورنىندا قۇتقارۋ قىزمەتى جۇمىس ىستەۋدە. 150 تۇرعىن قاۋىپسىز جەرگە كوشىرىلدى. سۋ تاسقىنى باسەڭدەپ، قازىر تۇرعىندار ۇيلەرىنە ورالىپ جاتىر.
سونداي- اق، سۋ تاسقىنىنىڭ كەسىرىنەن ەركىنشىلىك اۋىلىنداعى 10 عا جۋىق ءۇي زارداپ شەككەن. وبلىس بويىنشا وزگە ەلدىمەكەندەردى باقىلاۋعا الدىق دەيدى توتەنشە جاعداي دەپارتامەنتى.
«31-ارنا»
