بيىلعى «قازاقستان بارىسى» تۋرنيرى قاشان، قاي جەردە وتەدى؟
بۇل تۋرالى بۇگىن وتكەن باسپا ءسوز ءماسليحاتىندا ق ر قازاق كۇرەسى فەداراتسياسىنىڭ پرەزيدەنتى ارمان شورايەۆ ءمالىم ەتتى.
«وسى ۇلكەن دودانى بەسىنشى مارتە وتكىزگەلى جاتىرمىز. بۇگىندە «قازاقستان بارىسى جوعارى دەڭگەيگە جەتىپ وتىر. جوبانىڭ ارقاسىندا ۇزدىك بالۋاندار بۇكىل ەلگە تانىمال ازاماتتار رەتىندە تانىلدى. بۇل تۇرعىدا ولار جاستار مەن بۇلدىرشىندەرگە ۇلگى جانە ەلىمىزدە سپورتتى ناسيحاتتاۋعا ايتۋلى ۇلەس قوسۋدا»، - دەدى شورايەۆ.
اتاپ ايتقاندا، اتالعان تۋرنير اياسىنداعى ىرىكتەۋ ءتورت كەزەڭدە وتەدى. ءبىرىنشى كەزەڭدەگى ىرىكتەۋلەر اعىمداعى ءساۋىر بويى اۋىلدار مەن ەلدى مەكەندەردە، Ⅱ كەزەڭ - اۋداندى، قالالىق 1-15- مامىر ارالىعىندا، III كەزەڭ - وبلىستىق ىرىكتەۋلەر 20- مامىرعا دەيىن، سونداي-اق سوڭعى كەزەڭ اقتىق سىن. اقتىق سايىسقا قاتىساتىن بالۋاندار اراسىندا 19-23- مامىر ارالىعىندا الماتى قالاسىندا وقۋ-جاتتىعۋ جيىنى وتكىزىلەدى.
اۋىلدىق، اۋداندىق، قالالىق جانە وبلىستىق جارىستار مەن تۋرنيردىڭ اقتىق سىنى 18 جاستان جوعارى ەرەسەكتەر اراسىندا 80+ كەلى، ياعني ابسوليۋتتىك سالماق دارەجەسى بويىنشا وتكىزىلەدى. ءداستۇر بويىنشا فينالعا ىرىكتەۋ كەزەڭدەرىنەن وتكەن 32 بالۋانمەن قاتار بىلتىرعى جىلعى «قازاقستان بارىسى» رەسپۋبليكالىق تۋرنيرىنىڭ جەڭىمپازى مۇحيت تۇرسىنوۆ تا قاتىسادى.
اۆتور: رۋسلان عابباسوۆ
