ءبىرىنشى - قىتاي، ەكىنشى - قازاقستان

استانا. قازاقپارات - پەرۋدىڭ ليما قالاسىندا اۋىر اتلەتيكادان جاسوسپىرىمدەر اراسىنداعى الەم بىرىنشىلىگى اياقتالدى.

بۇل جارىستى قازاقستان قۇراماسى 2 التىن، 1 كۇمىس جانە 1 قولا مەدالمەن قورىتىندىلاپ، كوماندالىق ەسەپتە ەكىنشى ورىندى ولجالادى.

بۇعان دەيىن ءبىز 50 كەلى سالماقتاعى قازاقستاندىق زىلتەمىرشى يگور سون باس جۇلدەنى ولجالاعانى جايىندا جازعانبىز. ودان كەيىن 58 كەلى سالماقتاعى ايگەرىم اۋەلبەك ءوز جانكۇيەرلەرىن قۋانتتى.

قوسسايىستىڭ قورىتىندىسى بويىنشا، 192 (85+107) كەلىلىك زىلتەمىردى ەڭسەرگەن قازاق قىزى كۇمىس مەدالدى موينىنا ءىلدى. ايگەرىم تەك تايلاند سپورتشىسى ناۆاپورن داەنگسريدەن عانا قالىپ قويدى. چەمپيوننىڭ كورسەتكىشى -  207 (91+116) كەلى.

ءۇشىنشى ورىندا -  يسپانيالىق البا چانچەس فەررەر. 85 كەلى سالماقتاعى سايىستا دا قازاقستان قۇراماسىنا ءبىر مەدال بۇيىردى. بۇل جولى شىڭعىس ساعىندىقوۆ قولا جۇلدەگە قول جەتكىزدى. قانداسىمىز 299 (132+167) كەلىلىك زىلتەمىردى تىك كوتەردى.

ال باس جۇلدە ءۇشىن تالاس ۋكراينالىق يگور وبۋحوۆ پەن كولۋمبيالىق دجوناتان ريۆاس موسكۋەرا اراسىندا ءوربىدى. ەكەۋارا تارتىس العاشقىسىنىڭ پايداسىنا شەشىلدى. 316 (133+183) كەلىنى ىرقىنا كوندىرگەن وبۋحوۆ التىن تۇعىرعا كوتەرىلسە، ءوزىنىڭ باستى قارسىلاسىنان نەبارى ءبىر كەلى كەم كوتەرگەن موسكۋەرا كۇمىس مەدالدى يەلەندى.

جارىستىڭ سوڭعى كۇنى تاتيانا كاپۋستينانىڭ تەڭدەسسىز ونەرىنە ءتانتى بولدىق. قىزدار اراسىنداعى اسا اۋىر سالماقتا سىنعا تۇسكەن جەرلەسىمىز 243 (110+133) كەلىلىك كورسەتكىشپەن باس جۇلدەنى ولجالادى. ەكىنشى ورىن العان ەكۆادورلىق بەتزايبا كابەنزاس اۆوي ءبىزدىڭ تاتيانادان ءتورت كەلى از سالماقتى ەڭسەردى.

جالپى، رەسپۋبليكالىق وليمپيادالىق دايارلاۋ ورتالىعىنىڭ اعا جاتتىقتىرۋشىسى باقىت احمەتوۆ پەرۋدەگى دوداعا نەبارى التى سپورتشىنى عانا اپارعان ەدى. وسى ورايدا، مايتالمان مامان «سانعا ەمەس، ساپاعا جۇگىنەتىنىن» الدىن الا ەسكەرتكەن.

باقىتتىڭ بۇل ەسەبى دۇرىس بولدى. الەم بىرىنشىلىگىنە اتتانعان ورەندەرىمىزدىڭ تورتەۋى ەلگە ولجالى ورالدى. جۇلدە الماعان زىلتەمىرشىلەر دە جارىس جولىندا بارىن سالدى. ەڭ باستىسى، جالپى ەسەپتە، قازاقستان ۇزدىكتەر قاتارىنا ەركىن قوسىلىپ، ەكىنشى ورىندى ولجالادى. كوش باسىندا -  قىتاي. بۇل ەلدىڭ ءانۇرانى ليمادا التى مارتە شىرقالدى.

ءۇشىنشى ورىندا -  كولۋمبيا. ولار 2 التىن مەن 1 كۇمىسكە قول جەتكىزدى. سونداي-اق ۋكراينا، الجير، مەكسيكا، تايلاند جانە ەگيپەت ەلىنىڭ ورەندەرى دە ءبىر- ءبىر التىننان يەلەندى.

عالىم سۇلەيمەن

«ايقىن»