گرەكتەردىڭ جاعدايى قيىن
ول قانداي ۋادە بەرىپ ەدى؟
الەۋمەتتىك تەڭسىزدىكتى جويۋ، ەڭبەكاقىنى كوتەرۋ، زەينەتاقىنى تومەندەتپەۋ، سىرتقى قارىزدى جويۋ ءۇشىن ەۋرووداقتان كەشىرىم الۋ، ت. ب. تولىپ جاتقان حالىقتى ەلىكتىرەتىن «ءتاتتى» اڭگىمەلەر ەدى.
سودان بولار، پارلامەنتتىك تارتىستا حالىق سيريزانى قولدادى. سەبەبى، سوڭعى بەس جىلدا گرەكيا قاتاڭ ەكونوميكالىق قاعيدامەن ءومىر ءسۇردى. زەينەتاقى 40 پايىزعا تومەندەدى، باسپانا سالىعى بىرنەشە ەسەگە ءوستى، جۇمىسسىزدىق 26 پايىزعا بىردەن سەكىردى، ءبىر جىل ىشىندە كىم جۇمىس ىستەمەسە، ول جۇمىسسىزدىققا بايلانىستى بەرىلەتىن جاردەماقىدان جانە مەملەكەتتىك دارىگەرلىك كومەكتەن قاعىلدى. مۇنىڭ ءبارى حالىققا اۋىر تيگەن ەدى.
وسىنىڭ ءبارىن ەسەپكە العان سيريزا پارتياسى حالىقتى «كوممۋنيزمگە» جەتەلەيمىز دەپ ۋادە بەردى. ءبىراق ارادا بىرنەشە اي وتسە دە، ەش نارسە تىندىرمادى. دۇرىسى، قولدارىنان كەلمەدى.
الەكسيس تسيپراز ەۋرووداقتىڭ الدىنا قانشا جالىنىپ قول جايعانىمەن، ەشكىم ميللياردتاعان كرەديتتى بەرمەدى. كەرىسىنشە، ەلدە ءتۇرلى رەفورمالار جاساۋدى تالاپ ەتتى. ونسىز دا كۇنكورىستىڭ قىسپاعاندا قالعان حالىقتى بيلىك ودان ءارى قىسا تۇسۋگە شاماسى كەلمەي وتىر. ءتىپتى الەۋمەتتىك جارىلىستار بولىپ كەتە مە دەگەن الاڭداۋ دا بار.
وتكەن بەس جىل ىشىندە ەۋروپا ورتالىق بانكى مەن حالىقارالىق ۆاليۋتا قورى گرەك ۇكىمەتىنە 240 ميلليارد ەۆرو كرەديت بەردى. 100 ميلليارد يەۆرو بولاتىن سىرتقى قارىزىن كەشىردى. وسىنىڭ ءوزى گرەكيا ءۇشىن ۇلكەن كومەك ەدى. ءبىراق بۇگىنگى الەكسيس تسيپراز باسقارعان ۇكىمەت ونى ازسىنىپ، تاعى الاقان جايۋدا.
وسى اپتا باسىندا، حالىقارالىق ۆاليۋتا قورىنىڭ باسشىسى لاگارد «گرەكيا الدىمەن ەلدەگى زەينەتاقى جۇيەسىنە رەفورما جاساسىن، سوسىن ويلانىپ كورەمىز» دەگەندى مالىمدەدى. ءتىپتى ەۋرو ايماقتاعى مەملەكەتتەردىڭ باسپا ءسوز قۇرالدارىندا «ەۋرووداق گرەكيانى ءوز كەڭىستىگىنەن شىعارىپ تاستاۋ ءۇشىن، قۇپيا جوسپار دايارلاۋدا» دەگەن سىبىستاردى جاريالاي باستادى. سونىمەن گرەكيانىڭ باسىنداعى قارا بۇلت قويۋلانا ءتۇستى دەسەك ارتىق ايتپاعانىمىز.
