ۇشاقتا كەمپىر قۇتىردى

استانا. قازاقپارات - كوك اسپاننىڭ جۇزىندە نەشە ءتۇرلى وقيعالار بولىپ جاتادى.

سونداي ءبىر توسىن وقيعا كانادانىڭ ۇشاق بورتىندا ورىن الدى.

تورونتودان ۇشىپ شىققان «Air Canada» اۆياكومپانياسىنىڭ «بوينگ-777» ۇشاعى نەمىستىڭ فرانكفۋرگ قالاسىنداعى اۋەجايعا قونۋى كەرەك-تىن.

الايدا جەتەر جەرىنە جەتە الماي قالعان ۇشاق امالدىڭ جوعىنان يرلانديانىڭ دۋبلين شاھارىنداعى اۋەجايعا كەلىپ قوندى. سوندا نە بولدى دەيسىز عوي؟

 اتلانت مۇحيتىنىڭ ۇستىنەن ۇشىپ بارا جاتقان ساتتە، 87 جاستاعى كەمپىر اياقاستىنان ءوتىپ بارا جاتقان ستيۋاردەسسانىڭ قولىنان شاپ بەرىپ ۇستاپ الادى دا، ونىڭ بىلەگىن قىرشىپ تىستەپ الادى.

توقسانعا جاقىنداعان كەمپىردىڭ دە ءتىسى وتكىر بولادى ەكەن عوي، ونىمەن قويماي، كەيۋانا «دەرەۋ قونىڭدار» دەپ ۇشاق سالونىندا ۇرىس شىعارعان كورىنەدى. امالدىڭ جوعىنان دۋبلينگە كەلىپ قونعاننان كەيىن، قول تىستەگىش، «قانسورعىش» كەمپىردى پوليتسيا وكىلدەرى ۇستاپ اكەتكەن كورىنەدى.

تىنىق مۇحيتىنىڭ ۇستىندە تىنىش كەلە جاتقان كەمپىردى اياقاستىنان نە تۇلەن ءتۇرتتى؟ ول جاعى بەلگىسىز. الايدا كەيىن ءمالىم بولعانىنداي، 87 جاستاعى كەمپىردى قۇقىق قورعاۋ ورگاندارىنىڭ وكىلدەرى «بۇدان كەيىن سابىر ساقتايتىن بولىڭىز» دەپ بوساتىپ قويا بەرگەن كورىنەدى.
«ايقىن»