عالىمدار: شىلىم شەگۋ ادامنىڭ مي قىرتىسىن جۇقارتادى

استانا. قازاقپارات - شىلىم شەگۋ ادامنىڭ وكپەسىنە زيان كەلتىرىپ قانا قويماي، ونىڭ ويلاۋ قابىلەتىنە دە كەرى اسەرىن تيگىزەدى.

مۇنداي قورىتىندىنى ۇزاق ۋاقىت بويى شىلىم شەككەن ادامدار مەن ونى ەشقاشان شەكپەگەندەردىڭ باس ميىنىڭ قىرتىسىن زەرتتەگەن عالىمدار جاسادى.

زەرتتەۋگە 244 ەر ادام مەن 260 ايەل ادام قاتىستى. قاتىسۋشىلاردىڭ ورتاشا جاسى 73 جىلدى قۇراعان. زەرتتەۋ ادامداردىڭ جاسى ۇلعايعان سايىن تەمەكىنى نەعۇرلىم ۇزاق ءارى كوپ ۋاقىت شەكسە، باس ميى قىرتىسىنىڭ قاباتى سوعۇرلىم جۇقارا تۇسەتىنىن كورسەتتى.

بۇل رەتتە جامان ادەتىن قويىپ كەتە العانداردا ۋاقىت وتە كەلە جويىلىپ كەتكەن مي ۇلپاسى جارىم-جارتىلاي قالپىنا كەلگەن. 25 جىل جانە ودان دا كوپ ۋاقىت شىلىم شەككەن ادامدار ءۇشىن بۇل مۇمكىن بولمادى.

باس ميى قىرتىسىنىڭ جۇقارۋ پروتسەسى جاس ۇلعايعان سايىن ءاربىر ادامنىڭ اعزاسىندا ورىن الادى. تەمەكى شەگۋ بۇل پروتسەستى جىلدامداتادى. ال ادام ميىنىڭ ءدال وسى بولىگى ونىڭ اقىل-ويى مەن ەستە ساقتاۋ قابىلەتىنىڭ قىزمەتىنە جاۋاپ بەرەدى، دەپ حابارلايدى ا ي ف.