ارمان دۇيسەنوۆ «قازاق اۋەندەرى» ا ق پەن «گۇلدەر» انسامبلىن باسقاراتىن بولدى
ەندى ول «قازاق اۋەندەرى» اكسيونەرلىك قوعامى مەن «گۇلدەر» انسامبلىن باسقارادى.
«گۇلدەر» قازاقي ونەردى جاڭعىرتىپ، ءبيىن، كۇيىن، ءانىن، ءتىپتى ۇلتتىق كيىمىن دە زاماناۋيلاندىرىپ، ءار ادامنىڭ ۇلتى مەن تەگىنە قاراماي قىزىعۋشىلىعىن ارتتىرا بىلگەن انسامبل. «تاريحى 1969 -جىلدان باستاۋ العان ۇجىمنىڭ اتاعى كەزىندە تەك قازاقستان ەمەس، كەڭەس وداعىندا دۇركىرەپ تۇرعان»، - دەلىنگەن جاريالانىمدا.
ال، «قازاق اۋەندەرى» اكسيونەرلىك قوعامى 2005 -جىلى قۇرىلدى. اتالعان قوعام ويىن-ساۋىقتار مەن مەرەكەلىك كەشتەردى، بايقاۋلار، فەستيۆالدەر، پرەزەنتاتسيالار، شوۋ-باعدارلامالار، جەكە ورىنداۋشىلار مەن ونەر ۇجىمدارىنىڭ گاسترولدىك ساپارلارىن، كونسەرتتەرىن، شىعارماشىلىق كەشتەرىن، تەاتر قويىلىمدارىن ۇيىمداستىرۋ جانە وتكىزۋمەن اينالىسادى.
سونداي-اق مۋزىكا ونەرىنىڭ ءتۇرلى جانرى مەن باعىتتارىن دامىتاتىن ونەر ۇجىمدارى مەن جەكە ورىنداۋشىلاردىڭ شىعارماشىلىعىن تاسپاعا ءتۇسىرىپ، جارنامالاپ، ناسيحاتتايدى.
ەلىمىزدەگى جانە الىس-جاقىن شەتەلەردەگى شىعارماشىلىق ۇجىمدار، مادەنيەت جانە ونەر قايراتكەرلەرىمەن بىرلەسە وتىرىپ، كەڭ كولەمدى مادەني شارالاردى وتكىزۋ مەن مەگا-جوبالار دايىنداپ، رەسپۋبليكاداعى ءتۇرلى حالىق وكىلدەرىن ەسكەرە وتىرىپ، مادەني دامۋ ۇردىسىندە ءوزارا الماسۋدى قامتاماسىز ەتىپ، قولعابىس جاساۋ جانە جوسپارلانعان مادەني باعدارلامالاردى ويداعىداي جۇزەگە اسىرۋ ءۇشىن جارنامالىق- اقپاراتتىق قىزمەت جاسايدى.
بۇرىن سازگەرلىكپەن قاتار تەلەجۇرگىزۋشىلىكتى قاتار ۇستاعان ارمان دۇيسەنوۆ ەندىگى جەردە شىعارماشىلىق ۇجىمدارىمەن جاڭا بەلەستەرگە شىعۋ جولىندا ەڭبەك ەتپەك.
