ۇلى وتان سوعىسىنا قاتىسقان قازاق قىزدارى تۋرالى جاڭا كىتاپ جارىق كوردى

ورال. قازاقپارات - باتىس قازاقستان ينجەنەرلىك-گۋمانيتارلىق ۋنيۆەرسيتەتىنىڭ دوتسەنتى، تاريح عىلىمدارىنىڭ كانديداتى باقتىلى بورانبايەۆانىڭ «ۇلى وتان سوعىسىنا قاتىسقان باتىس قازاقستان وبلىسىنىڭ قازاق قىزدارى» اتتى عىلىمي-زەرتتەۋ ەڭبەگى جارىققا شىقتى.

ۇلى جەڭىستىڭ 70 جىلدىق مەرەكەسىنە وراي ورالداعى «پوليگرافسەرۆيس» باسپاسىنان شىققان جيناقتا اۆتوردىڭ ۇزاق جىلدار بويى جيناعان مۇراعات قۇجاتتارى، تاريحي دەرەكتەر، ەستەلىكتەر مەن فوتوسۋرەتتەر نەگىزىندە ۇلى وتان سوعىسىنا باتىس قازاقستان وبلىسىنان قاتىسقان جاۋىنگەر قازاق قىزدارى، بارلىعى 17 مايدانگەردىڭ ەرلىك جانە ءومىر جولدارى باياندالادى.

اتاپ ايتقاندا، كەڭەس وداعىنىڭ باتىرى، پۋلەمەتشى مانشۇك مامەتوۆا، 300 رەت اۋە شايقاسىنا قاتىسقان تۇڭعىش اسكەري ۇشقىش، حالىق قاھارمانى حيۋاز دوسپانوۆا، I گۆارديالىق شابۋىلداۋشى اۆياتسيالىق كورپۋس قۇرامىندا كالينين، سولتۇستىك- باتىس، بريانسك، I،  IIپريبالتيكا، I، II بەلورۋس مايداندارىنداعى سۇراپىل سوعىستارعا جانە «بەرلين» وپەراتسياسىنا قاتىسقان راديوبايلانىسشىلار عاريفا راحمەتوۆا، زاميحا ناۋشيەۆا، ۆيسلا وزەنى ماڭىنداعى شايقاستا دزوت ءۇنىن ءوشىرىپ، ءۇشىنشى دارەجەلى داڭق وردەنىنە يە بولعان، بەرلين كوشەلەرىندەگى ۇرىسقا قاتىسقان مەرگەن ءمۇسليما كوجاحمەتوۆا، «ەرلىگى ءۇشىن» مەدالىنىڭ يەگەرى، ەفرەيتور، مەرگەن قىز ماليكا توقتامىشوۆا، كارەليا مايدانىندا پارتيزان بولىمشەلەرىنىڭ  Ⅱكلاستى بايلانىسشىسى بولعان مايرا ماقاتوۆا، بەلورۋسسياداعى پارتيزاندىق قوزعالىسقا قاتىسقان «قىزىل جۇلدىز» وردەنى مەن «وتان سوعىسىنىڭ پارتيزانى» جاۋىنگەرلىك مەدالىنىڭ يەگەرى نۇرعانىم بايسەيتوۆا، « قىزىل جۇلدىز» وردەنى مەن «ەرلىگى ءۇشىن» مەدالىنىڭ يەگەرى، مەديتسينالىق قىزمەتتىڭ گۆارديا كاپيتانى روزا مومىنوۆا، وسى سياقتى قىزىل تۋلى 369-اتقىشتار ديۆيزياسىنىڭ مەديتسينالىق- سانيتارلىق ءبولىمىنىڭ دارىگەرى، اعا سەرجانت ءاسيا عالىموۆا، قيىر شىعىس مايدانىنا قاتىسقان قالامسيا ەرمەكوۆا، ءازيما نيازعاليەۆا، ءمۇسليما ۇمبەتوۆا، سونداي-اق جاپون ميليتاريستەرىنە قارسى سوعىستى سولتۇستىك كورەي ەلىندە اياقتاپ، جوعارعى باس قولباسشىنىڭ العىسحاتىمەن ماراپاتتالعان قانىم الماعامبەتوۆا مەن ءۇمىتاي ەسقاليەۆا، ستالينگراد شايقاسىنا قاتىسقاندار مەدبيكە ءارى پۋلەمەتشى، «ەرلىگى ءۇشىن» مەدالىنىڭ يەگەرى رابيعا زاينۋللينا جانە بايلانىسشى اعيپا كەنجەعاليەۆا جانە باسقالار تۋرالى مول ماعلۇمات بەرىلگەن.

اتالعان ەڭبەك وڭىردەن شىققان باتىسقازاقستاندىق مايدانگەر قازاق قىزدارى تۋرالى دەرەكتەردى العاش رەت ءبىر كىتاپقا توپتاستىرىپ بەرۋىمەن قۇندى.

اۆتور: ەلجان ەرالى