استانا اكىمى: بەيبەرەكەت ساۋدامەن كۇرەستى جۇيەلى تۇردە جۇرگىزۋ كەرەك

قالا باسشىسى بەيبەرەكەت ساۋدا قالا تۇرعىندارىنىڭ نارازىلىعىن تۋدىراتىن ماسەلەلەردىڭ ءبىرى ەكەندىگىنە توقتالدى.
اتاپ ايتقاندا، بۇل جاعداي «ارتەم» ساۋدا ورتالىعىنىڭ ماڭىندا كوپتەپ كەزدەسەدى. قالا باسشىسى ساۋدا نۇكتەلەرىندەگى انتيسانيتاريالىق جاعدايلاردى ەسكە سالدى.
- مۇنداي جاعداي ەلوردادا بولماۋى كەرەك. سونداي دۇڭگىرشەكتەر قالانىڭ بارلىق اۋداندارىندا بار. وسىعان جاۋاپتى قۇرىلىمداردىڭ باسشىلارىنا ەسكەرتۋ جاريالايمىن. بۇل جۇمىس كەشەندى ءارى جۇيەلى تۇردە جۇرگىزىلۋى ءتيىس، ەشكىم ءوز جۇمىسىن وزگەگە ارتا المايدى. مەن بۇل جاعدايدى ءوز باقىلاۋىما الامىن، - دەپ اتاپ ءوتتى اكىم.
ادىلبەك جاقسىبەكوۆ قالا اكىمىنىڭ ورىنباسارى ءنۇرالى اليەۆكە ءتيىستى مەملەكەتتىك ورگاندارمەن بىرلەسىپ، قالاداعى بەيبەرەكەت ساۋدانى جويۋ بويىنشا ءىس-شارالار جوسپارىن بەكىتۋ ءۇشىن ەنگىزۋدى تاپسىردى.
تالقىلاۋعا سالىنعان تاعى ءبىر ماسەلە - قۇرىلىس نىساندارىنىڭ جاعدايى. اكىم ولاردىڭ سىرت كەلبەتىنە نازار اۋداردى. لاس ءارى مايىسقان قورشاۋلار، جىرتىلعان باننەرلەر، ال كەي جەرلەردە ولاردىڭ ورنىنىڭ بوس تۇرۋى دا قالانىڭ جەكە بولىكتەرىنىڭ كوركىن كەتىرىپ تۇر.
- قۇرىلىس الاڭدارى قاۋىپتى نىسان بولىپ تابىلادى، سوندىقتان، جۇمىس باستالماي تۇرىپ قورشالۋى ءتيىس. قورشاۋلاردىڭ سىرتقى كورىنىسىنە، ماتەريالىنا جانە قۇرىلىسىنا قويىلاتىن بەلگىلى تالاپتار بار. م ا ق ب باسقارماسىنا ەكى اپتا ىشىندە بارلىق قۇرىلىس نىساندارى قورشاۋلارىن قالپىنا كەلتىرىپ، برەندتەۋدى تاپسىرامىن، - دەدى اكىم.
جيىن بارىسىندا قالا باسشىسى ەلوردادا بۇگىن باستالعان ەكولوگيالىق ايلىق تۋرالى ەسكە سالىپ، جالپىقالالىق سەنبىلىككە قالا تۇرعىندارىنىڭ بارلىعى قاتىسۋى كەرەك ەكەنىن اتاپ ءوتتى.
بۇل رەتتە سايلاۋ ۋچاسكەلەرىنە، تۇرعىن الاپتارىنا، قالا ماڭىنداعى اۋماقتارعا جانە بازارلارعا جاقىن اۋماقتاردى تازالاۋ مەن اباتتاندىرۋعا ەرەكشە كوڭىل ءبولۋ كەرەك ەكەنىن باسا ايتتى.