ە. ىدىرىسوۆ: قازاقستان باتىس پەن يران كەلىسسوزدەرىنىڭ ءساتتى اياقتالۋىنا مۇددەلى
بۇل تۋرالى بۇگىن ق ر سىرتقى ىستەر ءمينيسترى ەرلان ىدىرىسوۆ يران يسلام رەسپۋبليكاسىنىڭ سىرتقى ىستەر ءمينيسترى موحامماد دجاۆاد زاريفپەن كەزدەسۋىنەن كەيىن وتكەن بريفينگتە ءمالىم ەتتى.
«مەن قازاقستان اتىنان زاريف مىرزاعا جاقىندا لوزاننادا يادرولىق ماسەلەلەرگە قاتىستى وتكەن كەلىسسوزدەردىڭ ءساتتى اياقتالۋىمەن قۇتتىقتادىم. ءبىز بۇل كەلىسسوزدەردى ءجىتى باقىلاپ وتىرمىز. سەبەبى قازاقستان يادرولىق قارۋدى تاراتپاۋ جانە قارۋسىزدانۋ باعىتىندا ناقتى ۇستانىمعا يە. سوندىقتان كەلىسسوزدەردىڭ بارىسىن نازاردا ۇستاپ وتىردىق. ولار ءبىز ءۇشىن ماڭىزدى. سەبەبى ول جاھاندىق قاۋىپسىزدىككە دە، ساۋدا- ەكونوميكالىق احۋالعا دا اسەر ەتەدى. بۇل كەلىسسوزدەر بيىل ماۋسىم ايىندا بارشا ماسەلەلەردى قامتيتىن كەلىسىمدى قابىلداۋ ارقىلى نۇكتە قويىلادى دەپ ۇمىتتەنەمىز. وسى كەلىسسوزدەردىڭ ەكى كەزەڭىن وتكىزۋگە تالقىلاۋ الاڭىن ۇسىنعان ەل رەتىندە قازاقستان كەلىسسوزدەردىڭ ءساتتى اياقتالۋىنا مۇددەلى. ءبىز يران دەلەگاتسياسىنا مەيلىنشە جوعارى زەيىن، ستراتەگيالىق شىدامدىلىق جانە بارلىق تاراپتارعا وسى كەلىسسوزدەردى سوڭىنا دەيىن جەتكىزۋگە قاجەتتى ساياسي ەرىك- جىگەر تىلەدىك»، - دەپ اتاپ ءوتتى مينيستر.
ايتا كەتەيىك، يران يسلام رەسپۋبليكاسىنىڭ سىرتقى ىستەر ءمينيسترى موحامماد دجاۆاد زاريف قازاقستانعا جۇمىس ساپارىمەن كەلگەن بولاتىن. كۇننىڭ ەكىنشى بولىگىندە موحامماد دجاۆاد زاريف ق ر پرەزيدەنتى ن. نازاربايەۆپەن كەزدەسۋى بەلگىلەنگەن.
اۆتور: جاسۇلان جولدىبايەۆ
