الماتىدا ازيالىق بوكس كونفەدەراتسياسى باس اسسامبلەياسىنىڭ وتىرىسى ءوتتى
بۇل - ءتورت جىلدا ءبىر رەت بولاتىن ازيالىق بوكستىڭ الداعى كەزەڭگە دامۋ باعىتتارىن بەلگىلەيتىن اتاۋلى وقيعالاردىڭ ءبىرى.
اسسامبلەيا جۇمىسىنا ازيانىڭ 33 مەملەكەتىنىڭ 70 تەن استام وكىلى قاتىستى، ولار: كونفەدەراتسيانىڭ ۆيتسە-پرەزيدەنتتەرى مەن اتقارۋشى كوميتەتتىڭ مۇشەلەرى، ۇلتتىق فەدەراتسيالاردىڭ پرەزيدەنتتەرى مەن باس حاتشىلارى.
جۇمىس بارىسىندا وتكەن 4 جىلدىڭ ناتيجەلەرى قورىتىندالدى. سونىمەن قاتار، ۇلكەن سپورتتىق جيىلىمنىڭ قاتىسۋشىلارى الدا تۇرعان ماقساتتارعا توقتالىپ ءوتتى.
كۇن تارتىبىندەگى باستى ماسەلەلەردىڭ ءبىرى - ول كونفەدەراتسيانىڭ باسشىلىق قۇرامىن سايلاۋ. سونىمەن، ۇيىمنىڭ جاڭا ۆيتسە-پرەزيدەنتتەرى بولىپ ءراپىل جوشىبايەۆ (قازاقستان)، يۋنسۋك چانگ (يۋجنايا كورەيا)، چۋنحاۆادجرا پيچاي (تايلاند)، ورزۋبەك نازاروۆ (قىرگىزستان)، يۋسۋف الي ال كازيم (كاتار) سايلاندى.
جينالىستا كونفەدەراتسيانىڭ جاڭا لوگوتيپى مەن بيۋجەتى ناقتىلانىپ، 2015-جىلى وتەتىن سپورتتىق جارىستار بەلگىلەندى.
باس اسسامبلەياعا قاتىسۋشىلار الماتى وبلىسىنىڭ تالعار اۋدانىندا ورنالاسقان ا ي ب ا- نىڭ دۇنيە جۇزىلىك بوكس اكادەمياسىندا بولدى.
ا ي ب ا- نىڭ ۆيتسە-پرەزيدەنتى، ازيالىق بوكس كونفەدەراتسياسىنىڭ پرەزيدەنتى سەرىك قوناقبايەۆ اتاپ وتكەندەي: «بۇل الەمدە ءبىرىنشى سالىنعان جوعارى دارەجەلى وقىتۋ-جاتتىقتىرۋشى كەشەن. وسىنداي بىرەگەي نىسان ءبىزدىڭ ەلدە ورنالاسقانى - ءبىز ءۇشىن ماقتانىش».
