ۇستالىقتى جانىنا جاقىن تۇتقان شەبەر جاستاردى ۇيرەتۋگە نيەتتى

استانا. قازاقپارات - كونە داۋىرگە كوز جىبەرسەك، قازاقتىڭ تۇرمىس- سالتىن اعاش بۇيىمدارسىز ەلەستەتۋ قيىن.

ادامعا قاجەتتى كەرەك- جاراقتىڭ ءبارى قاتتى اعاشتىڭ الۋان تۇرلەرىنەن جاسالعان.

ۇستالىقتى كاسىپ ەتكەندەردىڭ ءوز ىسىنە ونەر دەپ قارايتىنىنا وسىنداي كونە جادىگەرلەر كۋا. ورالدا تۇراتىن سەرىكقالي عينياتوۆتى دا جەرلەستەرى جويىلىپ بارا جاتقان ونەردى جاڭعىرتىپ جۇرگەن شەبەر دەپ تانيدى.

سەرىكقالي عينياتوۆ كەزىندە ورال پەداگوگيكالىق ينستيتۋتىنىڭ كوركەم سۋرەت- گرافيكا فاكۋلتەتىن بىتىرگەن. ماماندىعى بويىنشا ءبىراز جىل مەكتەپتە ىستەپتى. قازىر جۇمىسسىز. ءبىراق قول قۋسىرىپ وتىرماي، جانىنا جاقىن سۇيىكتى ىسىمەن اينالىسادى.

اعاشتان ءتۇرلى كادەسىيلار مەن ساندىق جانە اس-سۋ قۇيۋعا ارنالعان ىدىستار جاسايدى. سەرىكقالي عينياتوۆ، اعاش ۇستاسى:

- ءوزىمنىڭ جانىما جاقىنى -  قازاقي بۇيىمدار. استاۋ جاساۋعا باتىلىم بارماي ءجۇردى. ءوزىمنىڭ تۋىندىلارىمدى قازىرگى زامان ديزاينىمەن، وزگەلەردەن بولەكتەۋ قىلىپ جاساپ جاتىرمىن.

اعاش جونۋدى العاش رەت اكەمنەن ۇيرەندىم دەيدى ۇستا. كەيىن قىزىعۋشىلىعى ارتىپ، قولىنا تۇسكەن كەز كەلگەن اعاش كەسىندىسى اڭ- قۇس پەن ىدىس- اياققا اينالاتىن بولعان. شەبەردىڭ پىكىرىنشە، ىدىس- اياقتىڭ قاراعاشتان جاسالعانى دۇرىس.

ويتكەنى قاراعاشتىڭ بويىنان بولىنەتىن باكتەريالار ادام اعزاسىنا وتە پايدالى. ال كەيبىر اعاشتار كەرىسىنشە زياندى ۋلارىن بولەدى. سوندىقتان قاراعايدان جاسالعان ىدىستار شۇبات، قىمىز سەكىلدى سالقىن سۋسىندارعا عانا جارايدى ەكەن.

سەرىكقالي عينياتوۆ، اعاش ۇستاسى:

- قازاقتىڭ اعاشتان ويىپ جاساعان ونەرى نەگىزىنەن العاندا بۇرىن وتە كوپ بولعان. مىناۋ كەنجەبەك ۇستانىڭ ەڭبەگى، مىناۋ تاعى بىرەۋدىڭ جاساعانى دەگەن دۇنيەلەر قازىر جوق. بولسا دا ءبىز كورمەيتىن بولامىز. ءقازىر وسى ءوزىمىزدىڭ ۋاقىتتا قازاقتىڭ ونەرىنە تالپىنىپ جاتقان، وسىنى ساتپاسام دا ءوزىم ىستەيىن دەگەن جىگىتتەر از.

«جاسىراتىنى جوق، كوز مايىمدى تاۋىسىپ جاساعان دۇنيەلەرىمنىڭ تابىس اكەلگەنىن دە قالايمىن»، - دەيدى سەرىكقالي. دەگەنمەن ۇستالىق -  ادامعا ءتۋابىتتى داريتىن ونەر. سوندىقتان سۇيىكتى كاسىبىنەن اجىراۋ ويىندا جوق. بۇل ىستە شەبەر ءوزىنىڭ وتباسى مۇشەلەرىن ەڭ جاقىن كومەكشىلەرى سانايدى.

نۇرگۇل عينيات، ۇستانىڭ قىزى:

- مەنىڭ اكەمنىڭ جاساعان زاتتارى حالىققا دا، وزىمىزگە دە ۇنايدى. ونى كەلىپ الىپ جاتادى، كەيدە كادەسىي رەتىندە بەرىپ جاتامىز. مەن ءوزىم ديزاينەر بولعىم كەلەدى، سول باعىتتا ءارتۇرلى كيىم ۇلگىلەرىن جانە مۋلتفيلم كەيىپكەرلەرىن دە سالامىن.

شەبەردىڭ قولى قاشاندا ورتاق. سوندىقتان ءساتتى شىققان ءاربىر بۇيىمنىڭ كادەگە جارايتىنى انىق. بولاشاقتا شاعىن سەح اشىپ، بىلگەنىن باسقالارعا ۇيرەتۋ دە ويدا بار. الايدا قازاقتىڭ ءتول ونەرى قولونەرىن دامىتسام دەيتىن جاستاردىڭ ازدىعى قىنجىلتادى دەپ وتىر شەبەر.

www.24.kz