قاراعاندى وبلىسىندا اپاتتىڭ الدىن الۋعا اسكەريلەر اتسالىسۋدا - فوتو

استانا. قازاقپارات - قاراعاندى وبلىسىنىڭ بىرنەشە ەلدى مەكەندى سۋ الىپ، وبلىستىڭ كوپتەگەن ايماعىندا ءالى قاۋىپ سەيىلمەي وتىرعانى بەلگىلى.

بۇگىندە اتالعان وبلىستىڭ كوكپەكتى، كيەۆكا، قاراعايلى، تالاپكەر پوسەلكەلەرىندە جەرگىلىكتى اتقارۋ ورگاندارى جانە توتەنشە جاعدايلار بولىمشەلەرىمەن بىرگە قازاقستان رەسپۋبليكاسى ۇلتتىق ۇلانىنىڭ اسكەري قىزمەتشىلەرى دە اپاتتىڭ الدىن الۋ شارالارىنا جۇمىلدىرىلۋدا.

بۇل تۋرالى ق ر ۇلتتىق ۇلانى «وڭتۇستىك» وڭىرلىك قولباسشىلىعىنىڭ باسپا ءسوز قىزمەتىنەن حابارلادى.

اسكەريلەر مۇندا ۇلتتىق ۇلاننىڭ الماتى، قاراعاندى قالالارىندا ورنالاسقان «وڭتۇستىك»، «ورتالىق» وڭىرلىك قولباسشىلىقتارىنان كەلىپ جەتتى. اسكەريلەردىڭ كۇشىمەن قازىرگى تاڭدا قار سۋىن بوگەۋ، سۋ ارنالارىن تازالاۋ جانە جاڭا ارنالار جۇرگىزۋ، ەلدى مەكەندەردەگى قالىڭ قاردى سىرتقا تاسۋ، سۋ بوگەيتىن قامشىقتارعا قۇم تولتىرۋ سىندى دايىندىق جۇمىستارى جۇرگىزىلۋدە.