08:01, 12 - ءساۋىر 2015 | GMT +5
قاتتى جەل ەكى جۇك كولىگىن اۋدارىپ تاستادى
استانا. قازاقپارات - باكۋدە قاتتى جەل ەكى جۇك كولىگىن اۋدارىپ تاستادى.
وقيعالاردىڭ ءبىرى باكۋ-اليات جولىنىڭ 19- شاقىرىمىندا گاراداگسكي اۋدانىنىڭ اۋماعىندا ورىن العان، دەپ حابارلادى Day.Az ANS TV- گە سىلتەمە جاساپ.
بولگاريا ازاماتى نيكولاي گەورگيەۆيچ كۋركوۆ جۇرگىزگەن جۇك كولىگى اليات كەنتىنە بارا جاتقاندا ونى جەل اۋدارىپ جىبەرگەن. جاپا شەككەندەر بولمادى.
الايدا وقيعا كولىك كەپتەلىسىنىڭ ورىن الۋىنا سەبەپ بولدى. سونىمەن قاتار جولعا جانار- جاعار ماي توگىلگەن. ءورتتىڭ الدىن الۋ ءۇشىن وقيعا ورنىنا ءورت سوندىرۋشىلەر كەلگەنى بەينەروليكتەن ءمالىم بولىپ وتىر.
وسى جولدا تاعى ءبىر تىركەمەسى بار جۇك كولىگى اۋدارىلدى. ول باكۋعا بارا جاتقان. كۋاگەرلەردىڭ سوزىنە قاراعاندا، جاپا شەككەندەر جوق. الايدا جۇك كولىگىنە ەداۋىر زيان كەلدى.
