بۋددا قازاقستاننان شىقتى ما؟

استانا. قازاقپارات - بەلگىلى ارحەولوگ ارمان ومارحودجيەۆ بۋددا ساق تايپاسىنان شىققانىنا سەنىمدى. جۋىردا ول نەپالعا بارىپ بۋددانىڭ ۇرپاعىنىڭ كومەگىمەن گەنەتيكالىق سىناق جاساپ كوردى. ارحەولوگ جيعان دەرەكتەر ساقتىڭ التىن ادامى مەن بۋددا ءبىر ادام بولۋى مۇمكىن ەكەنىن كورسەتتى،

 دەپ جازادى «ەكسپرەسس- ك» گازەتى.

 بۋددانىڭ ۇرپاعى بولىپ تابىلاتىن شاكيا تايپاسى گەنەتيكالىق زەرتتەۋگە كەلىستى. ناتيجەسىندە شاكيا قازاقتاردىڭ تۋىسى بولىپ شىقتى. سونىمەن قاتار، «ساقتان شىققان دانا» دەرەكتى فيلمىن قۇراستىرۋشىلار مۇنى ايعاقتايتىن بىرنەشە دالەل تاپقان. تاۋلى نەپالدا تابىلعان ارتەفاكتار ساقتىڭ زاتتارىنا ۇقساس. نەپال جانە قازاق تىلىندەگى كەي سوزدەر ۇقساس بولىپ كەلەدى. مىسالى، «جان» جانە «اپتا» سوزدەرى نەپال تىلىندە دە بار جانە ماعىنالارى دا قازاق تىلىندەگىدەي.

 ايتا كەتۋ كەرەك، بۋددا ساقتان شىقتى دەگەن كوكتەن الىنعان جوق. ءبىزدىڭ زامانىمىزداعى II عاسىردىڭ سوڭىندا ساقتار سولتۇستىك ءۇندىستاندى باسىپ العان. بۋددانىڭ حانزادا بولعانى بەلگىلى. سيدحارتحا گاۋتاما (بۋددانىڭ يندۋستىق اتى) ءتىرى كەزىندە سولتۇستىك ءۇندىستان مەن نەپالدا ساقتار بيلىك ەتكەن. ەندەشە ول ساق ۇرپاعى بولۋى ءتيىس. بۇل ونىڭ شاكيامۋني ەسىمىن دە راستايدى. ونىڭ ەسىمىنىڭ تىكەلەي اۋدارماسى «ساقتان شىققان دانا» دەگەندى بىلدىرەدى.