رەسپۋبليكالىق «ساردار» وليمپياداسى قازاقستاننىڭ اسكەري وقۋ ورىندارىنا تۇسەتىن ۇزدىك ۇمىتكەرلەردى انىقتايدى
«سىزدەردى Ⅱرەسپۋبليكالىق «ساردار» وليمپياداسىنىڭ اشىلۋىمەن قۇتتىقتايمىن. بارلىق تۇلەكتەردىڭ ەلىمىزدىڭ لايىقتى وتان قورعاۋشىلارى بولۋىنا شىن جۇرەكتەن تىلەكتەسپىن. وليمپيادانىڭ باستى ماقساتى - وتانعا شىن بەرىلگەن، پاتريوت، زەرەك تالانتتى جاستاردى انىقتاۋ»، - دەپ اتاپ ءوتتى اشىلۋ سالتاناتىندا ءسوز العان گەنەرال- مايور تالعات مۇحتاروۆ.
وليمپيادا ەلىمىزدەگى ازاماتتىق جانە اسكەري مەكتەپ تۇلەكتەرىنىڭ جەكە دامۋىنا، ەلىمىزدەگى اسكەري قىزمەت پەن قارۋلى كۇشتەردىڭ ابىرويىن ارتتىرۋعا ىقپال ەتەدى. ونىڭ اياسىندا جاستاردىڭ قازاقستاندىق جوعارعى اسكەري وقۋ ورىندارىنا تۇسۋگە دايارلىعى تەكسەرىلەدى.
قازاقستاننىڭ بارلىق وبلىستارىنان، الماتى جانە استانا قالالارىنان كەلگەن 60 تان اسا جاس ورەندەر ەكى كۇن بويى تەوريالىق جانە پراكتيكالىق بىلىمدەرىن سىناقتا كورسەتەدى. الدىمەن فيزيكا، ماتەماتيكا، قازاق ءتىلى جانە العاشقى اسكەري دايارلىق پاندەرى بويىنشا تەستىلەۋ تاپسىرمالارىن ورىنداپ، دەنە جانە اسكەري- قولدانبالى دايارلىقتى بايقاتادى. ونىڭ ىشىندە 3000 م، 100 مەترگە جۇگىرۋ جانە ءىشتى قاتايتۋ، جەكە ساپتىق دايارلىق، ا ك-74 اۆتوماتىن بولشەكتەۋ جانە قۇراستىرۋ بويىنشا سىناقتار تاپسىرادى.
«ساردار» وليمپياداسى استاناداعى ارميا گەنەرالى ساعادات نۇرماعامبەتوۆ اتىنداعى رەسپۋبليكالىق «جاس ۇلان» مەكتەبىنىڭ بازاسىندا وتۋدە. الداعى ۋاقىتتا وليمپيادانى الماتى، قاراعاندى جانە شىمكەنت قالالارىنداعى رەسپۋبليكالىق اسكەري مەكتەپ- ينتەرنانت بازالارىندە كەزەكپە- كەزەك وتكىزۋ قارالادى.
