قازاقستاندىقتار مەملەكەتتىك تۇرعىن ءۇي قورىنان تەك ءبىر تۇرعىن ءۇيدى جەكەشەلەندىرۋگە قۇقىلى

استانا. قازاقپارات - قازاقستاندىقتار مەملەكەتتىك تۇرعىن ءۇي قورىنان تەك قانا ءبىر تۇرعىن ءۇيدى جەكەشەلەندىرۋگە قۇقىلى.

بۇل تۋرالى ق ر جوعارعى سوتىنىڭ كەزەكتى جالپى وتىرىسىندا «ازاماتتاردىڭ تۇرعىن ءۇي- جايلاردى جەكەشەلەندىرۋ جونىندەگى زاڭداردى سوتتاردىڭ قولدانۋ تاجىريبەسى تۋرالى» نورماتيۆتىك قاۋلىسى بويىنشا بايانداما جاساۋ كەزىندە جوعارعى سوتتىڭ سۋدياسى باعلان ماقۇلبەكوۆ ءمالىم ەتتى.

ب. ماقۇلبەكوۆ اتاپ وتكەندەي، جوعارعى سوتتىڭ اتالعان نورماتيۆتىك قاۋلىسى قازاقستان رەسپۋبليكاسىنىڭ مەملەكەتتىك تۇرعىن ءۇي قورىنان بەرىلەتىن تۇرعىن ءۇي- جايلاردى ازاماتتاردىڭ جەكەشەلەندىرۋ ماسەلەلەرى تۋرالى زاڭنامانىڭ كەيبىر نورمالارىن بىركەلكى ءتۇسىنۋ جانە سوت تاجىريبەسىندە دۇرىس قولدانۋ ماقساتىندا ازىرلەندى.

جوعارعى سوتتىڭ اتالعان ماسەلەگە قاتىستى قولدانىستاعى نورماتيۆتىك قاۋلىسى 1997 - جىلدىڭ 18 - شىلدەسىندە قابىلدانعان. جوعارىدا اتالعان نورماتيۆتىك قاۋلىنى قابىلداعاننان كەيىن ءبىرقاتار زاڭنامالىق اكتىلەر ايتارلىقتاي وزگەرىستەرگە ۇشىرادى.

«جاڭا قاۋلىدا قازاقستان رەسپۋبليكاسىنىڭ ازاماتتارى ەل اۋماعىندا مەملەكەتتىك تۇرعىن ءۇي قورىنان تەك قانا ءبىر تۇرعىن ءۇيدى جەكەشەلەندىرۋگە قۇقىلى ەكەندىگى قاراستىرىلعان. كۋپوندىق مەحانيزم ارقىلى تۇرعىن ءۇيدى جەكەشەلەندىرۋگە قاتىسۋ جانە تۇرعىن ءۇي- جايدى نەگىزگى جالداۋشى وتباسى مۇشەسىنىڭ بۇرىن جەكەشەلەندىرىلگەن تۇرعىن ۇيدەگى ۇلەسى ەلۋ پايىزدان كەم بولۋى ونىڭ مەملەكەتتىك تۇرعىن ءۇي قورىنان تۇرعىن ءۇيدى جەكەشەلەندىرۋ قۇقىعىن كەيىننەن ىسكە اسىرۋىنا كەدەرگى كەلتىرمەيدى»، - دەيدى ول.

سونىمەن بىرگە، ازاماتتاردىڭ، ەگەر دە: قازاقستان رەسپۋبليكاسى اۋماعىندا مەنشىك يەسى قۇقىعىندا وزگە تۇرعىن ءۇيى بولسا، بۇل رەتتە تۇرعىن ۇيدەگى ۇلەسىنىڭ ەلۋ پايىزدان كەم بولۋى ەسكەرىلمەيدى؛ قازاقستان رەسپۋبليكاسى اۋماعىندا يپوتەكالىق تۇرعىن ءۇي زايمى شارتى بويىنشا مىندەتتەمەسى بولسا؛ جەكەشەلەندىرۋگە جۇگىنگەن ساتكە دەيىن سوڭعى بەس جىل ىشىندە ولارعا مەنشىك يەسى قۇقىعىندا تيەسىلى تۇرعىن ءۇيدى يەلىكتەن شىعارسا، مەملەكەتتىك تۇرعىن ءۇي قورىنان الىنعان تۇرعىن ءۇيدى جەكەشەلەندىرە المايدى.

جەكەشەلەندىرۋ تۋرالى شارتتى رەسىمدەۋ، تەك مۇنداي جەڭىلدىكتەرگە يە ادامعا عانا جاسالادى. مۇنداي جاعدايدا جەكەشەلەندىرىلەتىن ءۇي- جاي وتباسىنىڭ كامەلەتكە تولعان مۇشەلەرىنىڭ كەلىسىمىمەن اتالعان جەڭىلدىكتى پايدالاناتىن ادامنىڭ جانە ونىڭ وتباسى مۇشەلەرىنىڭ ورتاق بىرلەسكەن مەنشىگىنە اۋىسادى. مۇنداي جەكەشەلەندىرىلگەن ءۇي- جايدىڭ يەسى جەكەشەلەندىرۋ تۋرالى شارتقا ەنگىزىلمەگەن ادامداردى ءوز قالاۋى بويىنشا تۇرعىن ۇيدەن شىعارا المايدى.

اۆتور: رۋسلان عابباسوۆ