مۇز استىنا ءتۇسىپ كەتكەن دوسىن قۇتقارعان بالاعا قۇرمەت كورسەتىلدى - فوتو
دەپارتامەنتتىڭ باسپا ءسوز قىزمەتىنەن تۇسكەن مالىمەتكە قاراعاندا، بۇل وقيعا جەلتوقسان ايىنىڭ باسىندا بولعانىمەن، بالالار ونى كەيىن ايتقان.
بالالار بوكس سەكسياسىنان قايتار جولدا جايىق وزەنىنىڭ ءالى تولىق قاتىپ ۇلگەرمەگەن مۇزىن بايقاپ كورگىسى كەلەدى. 5-6 بالا قاڭىلتىرعا ءمىنىپ، مۇز ايدىنىندا سىرعاناق تەبۋدى ءجون ساناسا كەرەك. كەنەتتەن مۇز جارىلا باستاپ، شيراق بالالار جان- جاققا جۇگىرىپ كەتكەندە، ءاليحان سۋدا جالعىز قالادى.
سول كەزدە مەيرامبەك اۋباكىروۆ بولماعاندا، بالا سۋعا كەتەر ەدى. ول كىدىرمەستەن ءاليحانعا كومەك كورسەتۋگە ۇمتىلادى.
«بالالار سۋعا باتىپ بارا جاتقان دوسىنا جاعادا قورقىنىشپەن قاراپ تۇرعان كەزدە مەن جورعالاپ بارىپ، تاياۋ جەردە جاتقان ۇزىن تاياقتى ءاليحانعا لاقتىردىم»، - دەيدى مەيرامبەك. زارداپ شەگۋشى تاياقتى مىقتاپ ۇستاپ، جاس قۇتقارۋشى مۇز ويىندىسىنان يىعىنان تارتىپ شىعارىپ الادى. بالاسىنىڭ باتىل قيمىلىنا اكەسى ساياحات اۋباكىروۆ تە رازى.
سالتاناتتى جيىندا ز. بەرداشيەۆ مەيرامبەكتىڭ ءىسىن ۇلگى ەتۋمەن قاتار وعان مەكتەپ بىتىرگەننەن كەيىن قۇتقارۋشىلار دايارلايتىن كوكشەتاۋ تەحنيكالىق ينستيتۋتىندا وقۋدى ۇسىندى.
ايتا كەتەيىك، ءاليحان مەيرامبەكتىڭ اناسىنىڭ الىس تۋىسى ەكەن.
