ق. ءمامي سوت جۇيەسىندەگى قۇجاتتاردىڭ قازاقشا ماتىنىندە قاتە جىبەرمەۋدى تاپسىردى

استانا. قازاقپارات - بۇگىن ق ر جوعارعى سوتىنىڭ كەزەكتى پلەنارلىق وتىرىسىندا نورماتيۆتىك قاۋلىنى تالقىلاۋ كەزىندە وسى سوتتىڭ ءتوراعاسى قايرات ءمامي قۇجاتتاردىڭ قازاقشا ماتىنىندە قاتە جىبەرمەۋدى جۇكتەدى.

وتىرىس بارىسىندا قۇجاتتاردىڭ قازاقشا نۇسقاسىنداعى كەيبىر كەمشىلىكتەر ماسەلەسى ءسوز بولدى. ءوز كەزەگىندە قايرات ءمامي قۇجاتتار بويىنشا قانشالىقتى جۇمىس جاسالسا دا، وسىنداي قاتە جىبەرۋگە بولمايتىندىعىن، وسى قۇجاتتاردى قاراعان سۋديالار كوزگە ءتۇسىپ تۇرعان قاتەنى جىبەرمەۋگە ەرەكشە ءمان بەرۋى ءتيىس ەكەنىن قاداپ ايتتى.

«وسىنداي جاعدايلار «ءارقايسىمىزدىڭ ءوزىمىزدىڭ جۇمىسىمىز بار» دەگەننىڭ جانە كەيبىرەۋلەردىڭ سوت جۇيەسىنە جانى اشىمايتىندىعىنىڭ تاعى ءبىر كورىنىسى. گازەتكە نەمەسە تەلەارناعا شىققان كەي ارىپتەستەرىمىزدىڭ قازاق ءتىلىنىڭ جالعىز قورعاۋشىسى سەكىلدى كەۋدەسىن سوعىپ كەتەتىنى بار، ال ءدال ىسكە كەلگەندە «ءارقايسىڭ وزدەرىڭ جوندەپ ال» دەگەنگە سايادى. سوندىقتان جوعارعى سوت بارلىق سوت جۇيەسىنە ۇلگى بولۋىمىز كەرەك. وسى ورايدا نورماتيۆتىك قاۋلىلاردى قابىلداپ جاتقاندا بۇنداي سەلقوستىققا جول بەرمەۋ قاجەت»، - دەدى جوعارعى سوتتىڭ ءتوراعاسى.

بۇل تۇرعىدا ق. ءمامي اتالعان قاۋلىنىڭ قازاقشا ءماتىنى بويىنشا قاجەت بولسا فيلولوگ مامانداردى تارتۋ جونىندە القا ءتوراعاسىنا ءتيىستى تاپسىرما بەردى.

 ايتا كەتەيىك، بۇگىنگى وتىرىستا «قىلمىستىق ىستەردى اپەللياتسيالىق تارتىپپەن قاراۋ تاجىريبەسى تۋرالى» نورماتيۆتىك قاۋلىنىڭ جوباسى جانە «ازاماتتاردىڭ تۇرعى ۇيلەردى جەكەشەلەندىرۋ جونىندەگى زاڭداردى سوتتاردىڭ قولدانۋ تاجىريبەسى تۋرالى» نورماتيۆتىك قاۋلىسىنىڭ جوباسى تالقىلاندى.

اۆتور: رۋسلان عابباسوۆ