ءبىز قازاقستاندا تۇراقسىزدىق پەن جانجالعا جول بەرمەيمىز - ن. نازاربايەۆ

استانا. قازاقپارات - ءبىز قازاقستاندا تۇراقسىزدىق پەن جانجالعا جول بەرمەيمىز. بۇگىن ەلوردادا وتكەن «ەلباسىمەن بىرگە - جاڭا جەڭىستەرگە!» اتتى جاستار فورۋمىندا ق ر پرەزيدەنتى نۇرسۇلتان نازاربايەۆ وسىلاي دەدى.

ەلباسىنىڭ اتاپ وتۋىنشە، جەر شارى تۇرعىندارىنىڭ ۇشتەن ەكىسى داۋلەتى ورتاشا ەۋروپالىقتىڭ 5 پايىز تابىسىنا ءومىر سۇرۋدە. ولار عالامشار رەسۋرستارىن 40 ەسە، ەت ونىمدەرىن 75 ەسە كەم تۇتىنادى.

«ءتىپتى، ءبىر بريتاندىق باسىلىم داۋلەتى ورتاشا ەۋروپالىقتىڭ وتباسىنداعى ءۇي مىسىعى باسقا كەدەي ەلدەردىڭ تۇرعىندارىنا قاراعاندا ەتتى 2 ەسە كوپ تۇتىناتىندىعى ەسەپتەپ شىعارىپتى. دامىعان ەلدەردە تەك ءۇي جانۋارلارىنىڭ وزىنە الەمدەگى كەدەيشىلىككە ۇرىنعان 1 ميلليارد ادامىنىڭ ورتاشا تابىسىنان مول قارجى جۇمسالادى»، - دەدى ن. نازاربايەۆ.

 ق ر پرەزيدەنتىنىڭ سوزىنە قاراعاندا، 3 ميلليارد ادام تۇراتىن الەمنىڭ كەدەي ەلدەرىندەگى مىڭداعان قالا ستوكگولم، لوندون، پاريج، استانا، ءتىپتى حرومتاۋ مەن ساتبايەۆ قالالارىنا دا مۇلدەم ۇقسامايدى.

«ولار توڭىرەگىنىڭ ءبارىن قوقىس جايلاعان كارتوننان سالىنعان كۇركەلەر. بۇل كۇركەلەردىڭ تۇرعىندارى ەش ۋاقىتتا قارنى تويىپ تاماق ىشپەيدى، ولاردىڭ ءدارى- دارمەك، كىتاپ، تەحنيكا الۋعا، عالامتور مەن ساياحاتقا اقشالارى جوق. باقىتىمىزعا وراي، ءبىزدىڭ ورتاق جۇمىسىمىز، دامۋىمىزدىڭ جوعارى دەڭگەيى قازاقستانعا مۇنداي ەلدەردىڭ قاقپانىنا تۇسپەۋگە سەپ بولدى. دەگەنمەن، بىزدەرمەن قاتار قۇرىلعان ءبىرقاتار مەملەكەتتەر ءدال وسىنداي قاقپانعا ءتۇسىپ قالدى. سوندىقتان دا ول جاقتا تۇراقسىزدىق، جانجال، قان توگىلىپ، ادامدار ولۋدە. ءبىز وعان جول بەرمەدىك جانە ءبىزدىڭ قازاقستانىمىزدا ونداي بولمايدى»، - دەدى ەلباسى.

 اۆتور: مارلان جيەمباي