لاتۆيادا قازاق جىگىتتەرى ءوز قانداستارى وتباسىن كەپىلگە الدى
ناۋرىز ايىنىڭ باسىندا لاتۆيا مەملەكەتتىك پوليتسياسىنا ۇيىمداسقان قىلمىستىق توپ مۇشەلەرىنىڭ ۇزاق ۋاقىتتاردان بەرى وسى ەلدە تۇرىپ جاتقان قازاق وتباسىن كەپىلگە العانى تۋرالى اقپار ءتۇستى.
كەپىلگە الىنعاندار اراسىندا ەرلى- زايىپتىلار مەن ولاردىڭ ءبىرى 8 دەگى، ەكىنشىسى 6 داعى ەكى قىزى بولعان. قىلمىسكەرلەر ءوز قۇرباندارىن قالاداعى پاتەرلەردىڭ بىرىندە جاسىرىن ۇستاعان.
الايدا، ولاردىڭ ءدال مەكەنىن پوليتسەيلەر ءوز كۇشتەرىمەن تاپتى. «قىلمىسكەرلەر كەپىلگە الىنعانداردى بوساتۋ ءۇشىن وتباسىنداعى ايەلدىڭ اكەسىنەن الماتى قالاسىنداعى قۇنى 400000 دوللار تۇراتىن جىلجىمالى مۇلكىن باسقا ادامنىڭ اتىنا اۋدارۋدى تالاپ ەتكەن.
كەپىلدە وتىرعاندار وزدەرىن ۇرلاپ كەتكەندەرمەن بۇرىن تانىس بولماعان»،- دەلىنگەن حابارلامادا.
پوليتسيا قۇربانداردىڭ ديگنياس كوشەسىندەگى پاتەردە (بۇل جىلجىمايتىن مۇلىك كەپىلگە الىنعانداردىڭ مەنشىگى) جاسىرىن ۇستاپ وتىرعانى بەلگىلى بولعان كەزدە، ولاردى قۇتقارۋ وپەراتسياسىن جۇرگىزۋ تۋرالى شەشىم قابىلداندى.
شابۋىل جاسالعان كەزدە پاتەردە كەپىلگە الىنعاندار مەن ۇيىمداسقان قىلمىستىق توپتىڭ ەكى مۇشەسى بار ەكەن. ولار 1985 جانە 1990 -جىلى تۋعان قازاقستان ازاماتتارى بولىپ شىقتى.
كۇدىكتىلەر سول جەردە قولعا ءتۇستى. ال ولاردىڭ سىبايلاستارى - 1966 جانە 1968 -جىلى تۋعان ەكى قازاق ازاماتى ءسال كەيىنىرەك ۇستالدى.
قازىرگى ساتتە كۇدىكتىلەردىڭ ءبارى قاماۋدا وتىر. تەرگەۋ جالعاسىپ جاتىر.
«ەگەمەن قازاقستان»
