الماتىداعى اتاكەنتتە كىتاپ كورمەسى ءوتتى
الماتىداعى «اتاكەنت» ورتالىعىندا قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن «اتاكەنت-ەكسپو» حالىقارالىق كورمە كومپانياسى ق ر ۇلتتىق كىتاپ پالاتاسى جانە قازاقستان باسپاگەرلەرى، پوليگرافيستەرى جانە كىتاپ تاراتۋشىلار اسسوتسياتسياسىمەن بىرگە «ۇلى جىبەك جولىمەن» اتتى كورمە وتكىزدى.
بۇل كورمە - قازاقستاننىڭ مادەني ومىرىنە، الىس جانە جاقىن شەتەلدىك كىتاپ شىعارۋشىلار مەن كىتاپ تاراتۋشىلار، پوليگرافيستەردىڭ قىزمەتتەرى ءۇشىن ماڭىزدى وقيعا بولدى. كوپتەگەن مەملەكەتتەردىڭ باسپا پوليگرافيا جانە كىتاپ ساتۋشى كومپانيالارى اراسىنداعى مادەني جانە ىسكەرلىك بايلانىستاردىڭ كەڭەيۋى - كورمەنىڭ بىردەن- ءبىر كورسەتكىشى بولىپ تابىلادى. بايلانىستاردىڭ دامۋى كىتاپ شىعارۋ، پوليگرافيا جانە كىتاپ ساۋداسىندا جاڭا تەحنولوگيالاردىڭ ەنۋىنە مۇمكىندىك بەرەدى.
كورمەنىڭ نەگىزگى ماقساتى - قازاقستاننىڭ، ت م د مەملەكەتتەرى، ورتالىق ازيا مەن شەتەلدەردەگى كىتاپ جانە پوليگرافيا نارىعى تۋرالى ءوزارا اقپارات الماسۋ، مەملەكەتتەردىڭ ەڭ ۇزدىك زاماناۋي كىتاپ ونىمدەرىنىڭ تۇرلەرىن، كىتاپ شىعارۋ جانە پوليگرافيا سالاسىندا جاڭا تەحنولوگيالاردى ۇسىنۋ بولىپ تابىلادى.
سونىمەن بىرگە مەملەكەتارالىق ادەبي بايلانىستاردى كەڭەيتۋ، اۆتورلاردىڭ، وقىرمانداردىڭ، مامانداردىڭ ءوز مەملەكەتى مەن شەتەلدەردىڭ ادەبيەتى مەن مادەنيەتىنىڭ دامۋىنا ىقىلاس تانىتاتىندارعا جاڭا مۇمكىندىكتەر بەرۋ.
رەسەي، بەلارۋس، قازاقستان، ۋكراينا، قىتاي، تۇركيا، يران، گەرمانيا، ءۇندىستان، تاجىكستان جانە وزگە دە ەلدەردىڭ جەتەكشى باسپالارى كورمەگە قاتىستى. كورمەنىڭ رەسمي اشىلۋىنا قازاقستان رەسپۋبليكاسى مادەنيەت جانە سپورت مينيسترلىگىنىڭ جاۋاپتى قىزمەتكەرلەرى، جازۋشىلار وداعىنىڭ، قالالىق اكىمشىلىك باسشىلارى قاتىستى. كورمەنىڭ اتالمىش مينيسترلىكتىڭ جاۋاپتى حاتشىسى ق. ۋاليەۆ مىرزا كورمەنىڭ وتكىزىلۋىن قاداعالايتىن بولادى.
سونداي- اق كورمە اياسىندا ءتۇرلى كونفەرەنسيالار، دوڭگەلەك ۇستەلدەر، كەزدەسۋلەر، سەمينارلار مەن كىتاپ نارىعى كاسىپقويلارىنا، باسپاگەرلەرگە، كىتاپ ساتۋشىلارعا، ادەبي اگەنتتىكتەرگە باعىتتالعان ءىس-شارالار دا وتپەك. مۇحتار شاحانوۆ، روللان سەيسەنبايەۆ، رەسەيلىك ستانيسلاۆ ۆوستوكوۆ، اناتوليي كيم، سەرگەي بەلياكوۆ سياقتى جازۋشىلارىمىزبەن دە شەبەرلىك ساعاتتارى بولادى. بۇل ءىس-شارالار ورتا مەكتەپتەردە، كوللەدجدەردە، جوعارى وقۋ ورىندارىندا، كىتاپحانالاردا جالعاسپاق.
كورمەنىڭ سوڭعى كۇنىندە كورمە قوناقتارىنا، قاتىسۋشىلارعا، ساياساتكەرلەر مەن قوعام قايراتكەرلەرىنە ارنالىپ، «كىتاپ مادەنيەتىنە قوسقان ۇلەسى ءۇشىن» اتتى مەدالى تابىس ەتىلەدى.
ودان بولەك، 2013-2014 -جىلعى ەڭ ۇزدىك كىتاپ باسىلىمدارىنا 7 نوميناتسيا بويىنشا گران-پري جانە ديپلومدارمەن ماراپاتتاۋ ءراسىمى وتەدى.
«ۇلى جىبەك جولىنا» 75 تەن استام باسپالار جانە كىتاپ ساتۋشى مەكەمەلەر، ج و و، قازاقستان، رەسەي، بەلارۋس، قىتاي، يران جانە ت. ب. ەلدەردىڭ مادەني قورلارى قاتىسۋدا.
«ايقىن»
