داۋرەن ەلەۋسىنوۆتىڭ كەلەسى قارسىلاسى بەلگىلى بولدى
28 جاستاعى قازاقستاندىق بوكسشى 18-ءساۋىر كۇنى پۋەرتو- ريكالىق حۋليو گارسيامەن جۇدىرىق تۇيىستىرەتىن بولدى.
داۋرەننىڭ قارسىلاسى اتانعان حۋليو گارسيا وسى ۋاقىتقا دەيىن كاسىپقوي بوكس شارشى الاڭىندا 14 كەزدەسۋ وتكىزىپ، ونىڭ 6 كەزدەسۋىندە جەڭىسكە جەتسە، 8 كەزدەسۋىندە جەڭىلىپ قالعان. ال داۋرەن ەلەۋسىنوۆ كاسىپقوي بوكستاعى ءوزىنىڭ ءبىرىنشى جەكپە-جەگىن 3-جەلتوقسان كۇنى ا ق ش- تىڭ نيۋ-يورك قالاسىندا وتكىزىپ، 21 جاستاعى امەريكالىق ەنتوني مەددەندى ۇتقان بولاتىن.
داۋرەن ەلەۋسىنوۆ پەن حۋليو گارسيا اراسىنداعى جەكپە-جەك ا ق ش- تىڭ پەنسيلۆانيا شتاتىنا قارايتىن ۆوللەي فوردج قالاسىندا وتەدى. وتانداسىمىز قازىرگى تاڭدا نيۋ-يوركتە وقۋ-جاتتىعۋ جيىندارىن وتكىزۋدە.
ايتا كەتەيىك، داۋرەن ەلەۋسىنوۆ بوكستان قازاقستان ۇلتتىق قۇراماسىنىڭ كاپيتانى دانيار ەلەۋسىنوۆتىڭ اعاسى. اۋەسقوي بوكستا 2001-جىلى ەل بىرىنشىلىگىندە العاش رەت شارشى الاڭعا كوتەرىلگەن. قازىرگى تاڭدا قازاقستاندىق بىلعارى قولعاپ شەبەرىنىڭ ەنشىسىندە حالىقارالىق جانە قۇرلىقتىق جارىستاردان يەلەنگەن بىرنەشە اتاقتارى بار. سونداي-اق، 2005-جىلى قازاقستان چەمپيونى اتانسا، 2009-جىلى ازيا چەمپيوناتىنىڭ قولا جۇلدەسىن جەڭىپ العان.
massaget.kz
