قىزدارعا قۇلاققاعىس: مۇندايدان ارى بولىڭىز

استانا. قازاقپارات - قىز بەن جىگىتتىڭ قارىم-قاتىناسى ايدىندا جۇزگەن قوس اققۋدىڭ جاراسىمدىلىعىنداي بولسا عانا سىرت كوزگە سۇيكىمدى كورىنەدى.

جاراسىمدىلىق ءۇشىن بىرنەشە كەڭەستى بىلە ءجۇرۋ كەرەك. ءبىز قىزدىڭ قىلىعىن تۇزەۋدى ءارى قاراي جالعاستىرامىز دا، قىزدارعا قۇلاققاعىس رەتىندە بۇگىنگە تومەندەگىدەي كەڭەستەردى ۇسىنامىز.

ەگەر جىگىتىڭىز دوستارىنىڭ اراسىندا تۇرسا، وعان داۋىس كوتەرىپ ايقايلاپ شاقىرماڭىز. ەر ادامدار مۇنداي قىلىققا دۇرىس كوزقاراس تانىتپايدى.

ونى كوپتىڭ كوزىنشە شەكتەن تىس ەركەلەتىپ، «قويانىم»، «تومپاعىم» دەپ بەتىن قىزارتپاڭىز. جىگىتتەر سوسىن ءبىرىن-ءبىرىنىڭ قىزدارىنىڭ سونداي قىلىقتارىن ايتىپ، بىرىنە-ءبىرى قالجىڭداپ وسى ارەكەتىڭىزدى ونىڭ بەتىنە باسىپ جۇرسە، ىڭعايسىز بولادى.

جىگىتىڭىزگە قوعامدىق ورتادا، كوزگە كوپ تۇسەتىن جەردە ايمالاپ، جابىسا بەرمەڭىز. بۇل ءسىزدىڭ كوشە ەتيكەتىن بۇزعانىڭىز جانە ءوز ارىڭىزعا ءوزىڭىز قارسى كەلگەندىگىڭىز بولىپ سانالادى. مۇنداي اياۋلى سەزىمدەردى كوپتىڭ كوزىنەن دە، سوزىنەن دە جاسىرىپ، نەكەگە عانا ساقتاڭىز.

جىگىتىڭىز تۋىستارى مەن دوستارىنىڭ كوزىنشە اتىڭىزدى اتاپ شاقىرسا، قالاي دا كەلۋگە تىرىسىڭىز. جانە ونىڭ سوزىنە قارسى شىعىپ، بەتىننەن الىپ، توسىنە شاپپاڭىز. قىزعا ءتان يباڭىزدى كورسەتىپ، كوپ الدىندا جىگىتىڭىزدىڭ مەرەيىن اسقاقتاتىڭىز.

ۇلكەن ادامدار وتىرعان ورىندا جىگىتىڭىزدىڭ اۋزىنا تاماق تىعىپ، ونى كىشكەنتاي بالاشا تاماقتاندىرماڭىز. قاجەتىنشە ءشايىن قۇيىپ بەرىپ، شەكتەن شىقپاي، جاعدايىن جاساڭىز.

جىگىتىڭىزدىڭ قالتاسىنا رۇقساتسىز قول سالىپ، جامان ارەكەتكە بوي الدىرىپ قويماڭىز. ونىڭ جەكە زاتتارى مەن قۇجاتتارىنا، سونىمەن قاتار، قالتاسىنداعى تيىنىنا دەيىن تيىسپەۋگە ادەتتەنىڭىز.

massaget.kz