مەملەكەتتىڭ بيزنەسكە ارالاسۋى زاڭ جۇزىندە شەكتەلەدى
توقتالا كەتەتىن جايت، مەملەكەت باسشىسىنىڭ تاپسىرىسىنا سايكەس، قازىرگى ۋاقىتتا ەكونوميكاداعى مەملەكەتتىك قاتىسۋدى بىرتە-بىرتە تومەندەتۋ جانە الەمدىك پراكتيكادا پايدالاناتىن «جاسىل پاراقتار» پرينتسيپتەرى ەنگىزىلۋدە. ونداي قاعيداتتارعا سايكەس، مەملەكەتتىك كاسىپورىندار مەن مەملەكەتكە تىكەلەي نەمەسە جاناما قاتىسى بار كومپانيالار سانىنىڭ ارتۋىن شەكتەۋ كوزدەلەدى.
ۇلتتىق ەكونوميكا ءمينيسترى ەربولات دوسايەۆتىڭ ايتۋىنشا، تۇتاستاي العاندا، زاڭ جوباسىنىڭ نەگىزگى ماقساتى بيزنەس قاتىساتىن ەكونوميكا سالالارىنا مەملەكەتتىڭ قاتىسۋى ۇلەسىن شەكتەۋ ءۇشىن قۇقىقتىق نەگىزدەردى بەكىتۋ بولىپ تابىلادى.
«مەملەكەتتىك كومپانيالارعا ەنشىلەس قۇرىلىمدار قۇرۋدان شەكتەۋ، ەكونوميكانىڭ بيزنەس قاتىساتىن سالالارىنا مەملەكەتتىڭ قاتىسپاۋى، كاسىپورىنداردىڭ ءرولىن كۇشەيتۋ قاجەتتىلىگى سەزىلىپ وتىر. بۇل رەتتە زاڭ جوباسىنىڭ نەگىزگى ماقساتى بيزنەس قاتىساتىن ەكونوميكا سالالارىنا مەملەكەتتىڭ قاتىسۋى ۇلەسىن شەكتەۋ ءۇشىن قۇقىقتىق نەگىزدەردى بەكىتۋ بولىپ تابىلادى. وسى ارقىلى مەملەكەتتىك اكتيۆتەردى باسقارۋ سالاسىنداعى زاڭناما جەتىلدىرىلەدى. وسىعان وراي، زاڭدى جەتىلدىرۋ باسەكەلەستىكتى ارتتىرا تۇسۋگە جانە جەكە كاسىپكەرلىكتىڭ جالپى دامۋىنا ىقپال ەتەتىن بولادى»، - دەدى ە. دوسايەۆ.
ونىڭ سوزىنە قاراعاندا، زاڭ جوباسىمەن جاڭا مەملەكەتتىك كاسىپورىندار مەن ەنشىلەس كومپانيالار قۇرۋعا قاتاڭ شەكتەۋ ەنگىزىلەدى. انىقتالعان قاعيداتتارعا قاراماستان قۇرىلعان مەملەكەتتىك كومپانيالار جەكەشەلەندىرىلىپ، مونوپوليالارعا قارسى ورگاندى كۇشەيتۋ كوزدەلەدى.
«بۇعان بايلانىستى زاڭ جوباسىندا مونوپولياعا قارسى ورگاننىڭ تاۋارلى نارىقتارىن باسەكەلەستىك ورتاعا بەرۋ ءۇشىن قىزمەت تۇرلەرىن جانە مەملەكەتتىك كومپانيالاردى انىقتاۋ تۇرعىسىندا جىل سايىنعى تالداۋ جۇرگىزۋدى بەكىتەتىن نورما ەنگىزىلەدى. تالداۋدىڭ ناتيجەسىندە ۇكىمەتكە باسەكەلەستىك ورتاعا بەرىلەتىن مەملەكەتتىك كومپانيالاردىڭ جانە قىزمەت تۇرلەرىنىڭ تىزبەسى جولدانادى»، - دەيدى ە. دوسايەۆ.
قۇجات ءبىرىنشى وقىلىمدا ماقۇلداندى.
اۆتور: قانات مامەتقازى ۇلى
