ويىن بيزنەسىنە ارنالعان زاڭ قابىلداندى

استانا. قازاقپارات - بۇگىن پارلامەنت سەناتىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا قارالىپ، قۇجات قابىلداندى.

قۇجات ەلىمىزدەگى ويىن بيزنەسى سالاسىنداعى زاڭ نورمالارىن جەتىلدىرۋدى كوزدەيدى. مۇندا ويىن بيزنەسى تۋرالى زاڭنامانى اينالىپ وتۋگە مۇمكىندىك بەرەتىن الشاقتىقتار مەن قايشىلىقتاردى جويۋ شارالارىن قاراستىرادى. سونىمەن قاتار ينتەرنەت-كازينو قىزمەتىنە، ونىڭ ىشىندە قازاقستان اۋماعىنداعى شەتەلدىك ينتەرنەت- كازينو قىزمەتىنە تىيىم سالۋ بەلگىلەنەدى. بۇدان بولەك، ويىن بيزنەسى سالاسىندا ليتسەنزيا الۋ كەزىندە ءوتىنىش بەرۋشىلەردىڭ تالاپتارىن قاتاڭداتۋ قاراستىرىلادى.

بۇدان بولەك، قۇجات ازاماتتىق پروتسەسسۋالدىق كودەكستە ينتەرنەت-كازينو قىزمەتىن زاڭسىز دەپ تانۋ مەحانيزمدەرى قاراستىرىلىپ وتىر. بۇدان بولەك، اكىمشىلىك قۇقىق بۇزۋشىلىق كودەكستە ويىن بيزنەسىنە قاتىستى زاڭ نورمالارىن بۇزعاندار ءۇشىن جاۋاپكەرشىلىكتەر ناقتىلانىپ، قوسىمشا جاۋاپكەرشىلىكتەر دە قامتىلادى.

بۇدان بولەك، زاڭ ارقىلى بۋكمەكەر كەڭسەسى جانە توتاليزاتور كاسسالارىنان الىناتىن سالىق 75 ايلىق ەسەپتىك كورسەتكىشتەن 150 ايلىق ەسەپتىك كورسەتكىشكە دەيىن ۇلعاياتىن بولادى. ال بۋكمەكەر كەڭسەسى مەن توتاليزاتوردىڭ ەلەكتروندىق كاسساسىنا سالىناتىن سالىق 2000 ايلىق ەسەپتىك كورسەتكىشكە دەيىن ارتادى. بۇل رەتتە ەلەكتروندىق كاسساعا سالىقتى ارتتىرۋ نەگىزىنەن ونى پايدالانۋشىلاردىڭ كوپتىگىنە قاراي ورىن الىپ وتىر.

ماسەلەن، ورتا ەسەپپەن العاندا ينتەرنەت-رەسۋرس ارقىلى ءباس تىگۋگە تىركەلگەن قاتىسۋشىلاردىڭ سانى 200 مىڭ ادامعا جەتەدى ءارى ولاردىڭ 50 پايىزى تۇراقتى قاتىسۋشىلار بولىپ تابىلادى.

قۇجاتتاعى باستى جاڭالىقتاردىڭ ءبىرى - ويىن مەكەمەلەرىن، بۋكمەكەر كەڭسەسى كاسسالارىن جانە توتاليزاتورلاردى تۇرعىن ءۇي عيماراتتارىنا ورنالاستىرۋعا تىيىم سالىنادى.

پارلامەنت قابىلداعان زاڭ مەملەكەت باسشىسىنىڭ قول قويۋىنا جولدانادى.

اۆتور: قانات مامەتقازى ۇلى