قازاقستان مەن قىتاي اراسىنداعى توتەنشە جاعدايلاردىڭ الدىن الۋ تۋرالى كەلىسىم قابىلداندى - پارلامەنت

استانا. قازاقپارات - بۇگىن پارلامەنت سەناتىنىڭ جالپى وتىرىسىندا «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى توتەنشە جاعدايلاردىڭ الدىن الۋ جانە ولاردى جويۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» ق ر زاڭى قابىلداندى.

قۇجات ەندى مەملەكەت باسشىسىنىڭ قول قويۋىنا جولدانادى.

كەلىسىمگە 2014-جىلعى 28- مامىردا استانادا قول قويىلعان. قۇجاتقا سايكەس، قازاقستان مەن قىتايدىڭ بىرەۋىنىڭ عانا كۇشىمەن جويۋ مۇمكىن بولمايتىن توتەنشە جاعدايلار ورىن الۋ ىقتيمالدىعىن نازارعا الا وتىرىپ، ەكى ەلدىڭ بىرلەسكەن ءىس-قيمىلدارىنىڭ اياسىندا وسى كەلىسىمدى جۇزەگە اسىرۋ كوزدەلەدى.

اتالعان كەلىسىمنىڭ كۇشىنە ەنۋى توتەنشە جاعدايلارعا بولجام جاساۋ جانە مونيتورينگ جۇرگىزۋ سالاسىنداعى تاجىريبە الماسۋدى كوزدەيدى. قاۋىپ تونگەن جاعدايدا تۇرعىنداردى دايارلاۋعا جاعداي جاسالىپ، ەكى مەملەكەتتىڭ ازاماتتىق قورعانىس سالاسىنداعى ماماندارىن وقىتۋ ماسەلەسى قاراستىرىلادى. كەلىسىم ءبىر تاراپتىڭ اۋماعىندا تۋىنداعان توتەنشە جاعدايلارعا قىسقا مەرزىمدە كومەك كورسەتۋگە مۇمكىندىك بەرەدى.

تۇتاستاي العاندا، قۇجاتتى قابىلداۋ دۇلەي ءزىلزالالاردان كەلەتىن قاۋىپتەردى ازايتۋعا، تاراپتاردىڭ اۋماعىندا تابيعي- تەحنوگەندىك سيپاتتاعى توتەنشە جاعدايلاردىڭ سالدارىن ازايتۋعا ىقپال ەتەتىن بولادى.

اۆتور: قانات مامەتقازى ۇلى