بوستون سوتى جوحار سارنايەۆقا ايىپتاۋ ۇكىمىن شىعاردى

استانا. قازاقپارات - جوحار سارنايەۆ بوستون مارافونى جارىلىسىنا كىنالى دەپ تانىلدى.

ا ق ش- تىڭ بوستون قالاسىندا وتكەن سارنايەۆ ىسىنە قاتىستى كەزەكتى سوت وتىرىسىنىڭ قورىتىندىسى وسىنداي.

القا بيلەردىڭ ايىپتاۋ ۇكىمى بويىنشا، جوحار سارنايەۆتىڭ تەررورلىق ارەكەت ۇيىمداستىرۋداعى قاساقانا ءىس-ارەكەتى تۇگەلدەي مويىندالدى.

ەندى ايىپتالۋشىعا جازا بەلگىلەۋ شاراسى عانا قالدى. سونىمەن، بوستوندا ءوتىپ جاتقان سوت وتىرىسى 21 جاستاعى رەسەي تۋماسى جوحار سارنايەۆتى بوستون مارافونى كەزىندەگى جارىلىسقا كىنالى دەپ تاپتى.

القا بيلەر سوتى ايىپتالۋشىعا جيىنى 30 باپ بويىنشا ايىپتاۋ ۇكىمىن شىعاردى. ونىڭ 17 سى ءولىم جازاسىن تاعايىنداۋعا قاتىستى. ايىپتاۋ ۇكىمىنە سايكەس، جوحار سارنايەۆتىڭ قاساقانا ادام ءولتىرۋ ماقساتىندا جاپپاي قىرىپ- جويۋ قارۋىن قولدانۋ، جارىلعىش زاتتى ازىرلەۋ، وتتى قارۋدى يەلەنۋ جانە كولىك ۇرلاۋ سياقتى نەگىزگى ايعاقتار بويىنشا كىناسى مويىندالدى.

الايدا بۇل وسىمەن سارنايەۆ ىسىنە تۇبەگەيلى نۇكتە قويىلدى دەگەن ءسوز ەمەس. ياعني الدا سوت وتىرىسىنىڭ كەلەسى كەزەگى ايىپتالۋشىعا ناقتى جازا ءتۇرىن بەلگىلەيتىن بولادى. ول بويىنشا جوحار سارنايەۆتى ءولىم جازاسى نەمەسە شارتتى مەرزىمىنەن بۇرىن بوساتۋ قۇقىعىنسىز ءومىر بويى باس بوستاندىعىنان ايىرۋ ۇكىمى كۇتىپ تۇر.

ايتا كەتۋ كەرەك، جوحاردىڭ ادۆوكاتى وعان تەك ءومىر بويىنا قاماۋعا الۋ جازاسىن قالاسا، ال پروكۋرورلار تۇپكىلىكتى ءولىم جازاسىن تاڭداپ وتىر. اپتا باسىنداعى سوت وتىرىسىندا پروكۋرورلار «جوحار سارنايەۆ ءوزىنىڭ قىلمىسى ارقىلى قاساقانا امەريكانى جازالاعىسى كەلگەن» دەپ مالىمدەگەنى بەلگىلى. ونىڭ جيھادشىلاردى وياتپاق ويى بولعان.

جالپى، ەستەرىڭىزگە سالساق، تۋرا ءبىر اپتادان سوڭ بوستون مارافونى جارىلىسىنا 2 جىل تولادى. 2013 -جىلدىڭ 15 -ساۋىرىندە جوحار سارنايەۆ تۋعان اعاسى تەمىرلان سارنايەۆپەن بىرگە ءداستۇرلى بوستون مارافونى كەزىندە جارىلىس ۇيىمداستىردى.

ودان 3 ادام قازا تاۋىپ، 260 ى جارالانعان بولاتىن. تەمىرلان سارنايەۆ قۇرىقتاۋ وپەراتسياسى كەزىندە پوليتسيا قولىنان قازا تاپقان ەدى. جارىلىسقا كىنالى جوحار سارنايەۆتىڭ سوت وتىرىسى ءبىر ايدان اسا جالعاسىپ كەلەدى. ءبىر عانا بۇگىنگى ايىپتاۋ ۇكىمىنىڭ ءوزى 11 ساعاتقا سوزىلعان. سوت ىسىندەگى القا بيلەردىڭ سانى 12 ادامنان تۇرادى.

ولاردىڭ بەسەۋى -  ەر، جەتەۋى -  ايەل. ال سارنايەۆتىڭ جازاسىنا قاتىستى سوت وتىرىسى الداعى اپتادا وتكىزىلمەك، ءبىراق ناقتى قاي كۇنى ەكەنى ازىرگە بەلگىسىز. وندا كۋاگەرلەر مەن جابىرلەنۋشى تاراپتىڭ كەزەكتى رەت سۇراق-جاۋاپتارى تىڭدالماق.

سونداي-اق سارنايەۆتىڭ ءوزى دە ءسوز سويلەۋى مۇمكىن.

اۆتورلارى: جىگەر سارسەن، انار گاريب

www.24.kz