سولتۇستىك قازاقستان اكىمدىگى وڭتۇستىكتىڭ مەكتەپ ءبىتىرۋشى تۇلەكتەرىن شاقىرادى
وتىنىشتەردى قابىلداۋ ۇلتتىق ءبىرىڭعاي تەستىلەۋدەن وتكەن سوڭ باستالادى، دەپ حابارلادى وڭتۇستىك قازاقستان وبلىستىق اكىمدىگىنىڭ رەسمي سايتى shymkenttv.kz سىلتەمە جاساي وتىرىپ.
قاناتقاقتى جوبانىڭ شاراپاتىن ەڭ العاشقىلاردىڭ ءبىرى بولىپ، وڭتۇستىك قازاقستاندىق 500 تۇلەك كوردى. ولار جوبا اياسىندا وڭىرىمىزدەن تىسقارى كەتىپ، رەسپۋبليكانىڭ 7 جوعارى جانە 23 ارناۋلى وقۋ ورىندارىنا گرانت نەگىزىندە وقۋعا ءتۇستى.
150 ستۋدەنت سولتۇستىككە جول تارتتى. وقۋ ورنىنا ستۋدەنت بولىپ قابىلدانىپ قانا قويماي، شاكىرتاقىعا يە بولدى. جولاقى، جاتاقحانا جانە جىلى كيىممەن قامتاماسىز ەتىلدى. بىلتىرعى تۇلەكتەر بيىل ءبىرىنشى كۋرستى بىتىرەدى.
ايتا كەتۋ كەرەك، بيىل مەملەكەتتەن بولىنەتىن گرانت ورىندارى كوبەيەدى. بۇل ءۇشىن جەرگىلىكتى قازىنادان ءار وقۋشىعا 495 مىڭ تەڭگە كولەمىندە قارجى قارالماق. وسىعان وراي، سولتۇستىك قازاقستان وبلىستىق ءبىلىم باسقارماسىنىڭ باسشىسى كۇنگەيلىك جاستاردى وقۋعا شاقىرىپ، وڭتۇستىك وبلىستاعى ارىپتەستەرىمەن بىرگە ارنايى بريفينگ وتكىزدى.
ورتا ارناۋلى وقۋ ورىندارىنا ءتۇسۋ ءۇشىن جوعارى بالدى جيناۋدىڭ قاجەتى جوق. تالاپ بويىنشا 30 بالدىق كورسەتكىشكە جەتسەڭىز بولعانى. تەحنيكالىق ءبىلىم العان تۇلەكتەردىڭ 75 پايىزى جۇمىسپەن قامتىلادى دەگەن جوسپار دا بار.
