بالەت ارتىستەرى ۇكىمەتتەن زەينەتكە ەرتە شىعارۋدى سۇرايدى

استانا. قازاقپارات - قازاقستاندىق بالەت ارتىستەرى وزدەرىنىڭ زەينەتكە شىعۋ جاسىنىڭ ۇزاقتىعىنا نارازى.

ولار ۇكىمەتتەن وزدەرىنىڭ زەينەتكە شىعۋ جاسىن قايتا قاراۋدى سۇرادى.

بۇل جايىندا «31-ارنا» حابارلايدى.

بۇرىن بالەت ارتىستەرى اۋىر دەنە قوزعالىستارىنا بايلانىستى 38-40 جاسىندا زەينەتكە شىعاتىن. 1997 -جىلدىڭ 20 -ماۋسىمىندا قابىلدانعان «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭىنا سايكەس ولاردىڭ زەينەتكە شىعۋ جاسىن قايتا وزگەرتتى.

قازىر ولار ەلىمىزدىڭ باسقا ازاماتتارىمەن بىردەي: ايەلدەر - 58 جاستا، ەر ادامدار - 63 جاستا زەينەتكە شىعادى.

قازاقستاندىق بالەتتىڭ اڭىزىنا اينالعان بولات ايۋحانوۆ زەينەتكەرلىك جاستى وزگەرتۋ ءۇشىن ءالى كۇنگە دەيىن كۇرەسىپ كەلەدى.

«ءبىزدىڭ زەينەتكەرلىككە شىعۋ جاسىمىزدى ءالى وزگەرتپەدى. بۇل بىزگە دەگەن قۇرمەتتىڭ جوقتىعى. سەبەبى، 35 جىل بويى ساۋساق ۇشىمەن بيلەۋ مۇمكىن ەمەس نارسە. باسشىلار مادەنيەت پەن ادەبيەتىمىزدى دامىتۋ تۋرالى كوپ ايتادى. ادەبيەتىمىز دە، كلاسسيكالىق بالەت تە بىرتىندەپ ءوشىپ كەلە جاتىر. بۇعان سەبەپ - قولداۋشىلاردىڭ جوقتىعى»، - دەپ قوستى ايۋحانوۆ.

تەلەارنانىڭ حابارلاۋىنشا، قازاقستاندىق بالەت ارتىستەرىنىڭ جالاقىلارى دا ماردىمسىز.

«ورتاشا جالاقى 100 مىڭ تەڭگە بولسا، جاستار ودان دا از الادى. اقشا تابۋىمىز ءۇشىن ويىن- ساۋىق كەشتەردە ونەر كورسەتۋىمىزگە تۋرا كەلەدى. سوندىقتان، مىقتى ارتىستەر كوبىنە شەتەل اسىپ كەتىپ جاتادى»، - دەدى «سەلەزنەۆ اتىنداعى الماتى حورەوگرافيالىق ۋچيليشەسىنىڭ» ديرەكتورى گۇلميرا بازاربايەۆا.