رەسەيدە ءمۇعالىم ءوز وقۋشىسىن ولتىرۋگە تاپسىرىس بەردى
جەندەتپەن كەزدەسكەن كەزدە ول 15 جاستاعى ءجاسوسپىرىمدى ءوز قولىمەن ولتىرگىسى كەلەتىنىن ايتقان.
بۇل تۋرالى lifenews.ru حابارلادى.
جەندەتپەن كەزدەسكەن كەزدە تاپسىرىس بەرۋشى: «ونى قاتتى قينالاتىنداي ەتىپ ۇرۋ كەرەك. ءبىر قولىن سىندىر! ءبىراق، بەتىنە تيىسپە! اياعىن سىندىرۋىڭا بولادى. بۇيرەكتەرىنەن ۇر!»، - دەپ ءوزى شىعارعان ۇكىمدى قالاي جۇزەگە اسىرۋ كەرەكتىگىن ءتۇسىندىرىپ بەردى.
سونداي-اق، ول ەڭ سوڭىندا وزىنە مۇمكىندىك بەرۋىن سۇرادى.
«مەن ونىڭ قينالعانىن كورگىم كەلەدى جانە ءومىرىنىڭ سوڭىندا وعان «جاقسى» سوزدەر ايتسام دەيمىن»، - دەيدى يۋليا س. ەسىمدى جانالعىش ءمۇعالىم.
جەرگىلىكتى اقپارات قۇرالدارىنىڭ حابارلاۋىنشا، يۋليا س. وقۋشىسىن ولتىرگىسى كەلەتىنىن، سول ءۇشىن جاقسى ءبىر جەندەتتىڭ كەرەكتىگىن ايتىپ، شاتۋرا قالاسىنىڭ تۇرعىنىنان كومەك سۇراعان. مۇنى ەستىگەن تانىسى بىردەن پوليتسياعا حابارلاسادى.
ناتيجەسىندە، پوليتسەيلەر مۇعالىممەن جەندەت رەتىندە كەزدەسكەن. ياعني، يۋليا س. ءوزىنىڭ ارام ويى تۋرالى پوليتسيا قىزمەتكەرىمەن اقىلداسادى. اڭگىمە اراسىندا ۇستاز «جەندەتكە» جۇمىسى ءۇشىن 100 مىڭ رۋبل تولەيتىنىن ايتادى. ءتىپتى قىلمىستى ورىنداۋعا قاجەتتى زاتتاردى ساتىپ الۋ ءۇشىن الدىن الا اقشا دا بەرەدى.
ءدال وسى كەزدە قۇقىق قورعاۋ ورگانىنىڭ وكىلدەرى ءمۇعالىمدى تۇتقىنعا الدى. قازىر وسىعان قاتىستى ءىس قوزعالىپ، سەبەپ-سالدارى انىقتالۋدا.
ەلامان قوڭىر.
اقپارات كوزى: «ەگەمەن قازاقستان»
