تۇرسىنوۆتىڭ «كەلىنى» مەن «شالى» قازاقتى قورلايتىن فيلمدەر - نۇرجۇمان ىقتىمبايەۆ

استانا. قازاقپارات - قازاقستاننىڭ بەلگىلى كينواكتەرى نۇرجۇمان ىقتىمبايەۆ رەجيسسەر ەرمەك تۇرسىنوۆتىڭ فيلمدەرىن سىنعا الدى.

كينو مايتالمانى بۇل تۋرالى «اق جەلكەن» جۋرنالىنا بەرگەن سۇحباتىندا ايتتى.

ونىڭ ايتۋىنشا، «كەلىن» جايىندا «وسكار» ءاپساناسىن شىعارىپ جۇرگەن ءبىزدىڭ جۋرناليستەر.

«وسكاردان» ساداعا كەتسىن «كەلىن». وسكار سىيلىعى ويىنشىق دەپ كىم ايتتى؟ «كەلىن» جايىندا «وسكار» ءاپساناسىن شىعارىپ جۇرگەن ءبىزدىڭ جۋرناليستەر. مۇنداي فيلمدەردى «وسكار» بوساعاسىنان سىعالاتپايدى.

«كەلىنى» دە، «شالى» دا قازاقتى قورلايتىن فيلمدەر. گولليۆۋدتىقتار كوك مي ەمەس. ەرمەكتىڭ كينوسىنا تۇسپەك تۇگىلى، «سەن قازاق ەمەسسىڭ، قازاقتان ءوشىن الا الماي جۇرگەن جاۋسىڭ!» دەپ بەتىنە ايتقام»، - دەدى اكتەر.

ىقتىمبايەۆتىڭ ايتۋىنشا، ەرمەك تۇرسىنوۆ قازاقتىڭ عاسىرلار بويى قالىپتاسقان مىنەزىن، بولمىسىن كەرى اينالدىرىپ بەرەدى. اكتەر وسىلايشا، فيلمدەردەگى ءوزى تاپقان قاتەلىكتەردى سانامالايدى.

«مىسالى، «شالدا» شال اداسىپ كەتەدى. تۋعان اۋىلىندا اداسقان قاي قازاقتى كوردىڭ؟ جىلقىنىڭ تابيعاتىن بىلمەيدى. تىزگىندى بوس ۇستاپ، اتتى جىبەرىپ قويساڭ، ول ءۇيىن ءوزى-اق تاۋىپ كەلەدى. قۇرتىمتاي بالانىڭ اتىن شايتانبەك دەپ قويادى. قاي قازاق نەمەرەسىن شايتانبەك دەيدى؟ سايدا قۇلاپ جاتقان اتاسىن نەمەرەسى اتتىڭ ۇستىنە قالاي مىنگىزدى؟ اعاش شانا تاۋىپ، سونىڭ ۇستىنە جاتقىزىپ اكەلسە سەنۋگە بولار ەدى. ونىڭ بار ويى - شەتەلگە اپارىپ قازاقتى مازاق ەتۋ. جاننا يسابايەۆا دەگەن دە سولاي، رەجيسسەر ەمەس»، - دەدى كينواكتەر.

سونىمەن قاتار، بەلگىلى اكتەر تيمۋر بەكمامبەتوۆتىڭ فيلمدەرىنە دە سىن ايتتى. «تيمۋر بەكمامبەتوۆتىڭ كەيىنگى جۇمىستارىن كورىپ، كوڭىلىم قالدى»، - دەيدى ول. - مەن ونىمەن «دنەۆنوي دوزوردا» بىرگە جۇمىس ىستەگەن اداممىن.

«س لەگكيم پاروم» مەن «وسوبو وپاسەندى» كورىپ، قولىمدى ءبىر-اق سىلتەدىم. ەكەۋىنىڭ دە كينو سيقى جوق.

قازىر بەكمامبەتوۆ رەجيسسەر رەتىندە تاۋسىلعان. باسقالاردى جالداپ، ءوزى پروديۋسەر بولىپ وتىر».

 ىقتىمبايەۆ رەجيسسەرلەردى ەكىگە ءبولىپ قاراۋ كەرەك ەكەنىن ايتادى. ونىڭ پىكىرىنشە، ءبىرىنشى توپ قۇدايدان رەجيسسەر بولىپ جاراتىلعاندار دا، ال ەكىنشىسى «تەحنار» رەجيسسەرلەر. سونىمەن، ىقتىمبايەۆتىڭ تالداۋىنشا، ءبىرىنشى توپقا شاكەن ايمانوۆ، ابدوللا قارساقبايەۆ، گەننادي بازاروۆتاردى جاتقىزۋعا بولادى، ال تيمۋر بەكمامبەتوۆ ەكىنشى توبىندا.
tengrinews.kz