13:30, 08 - ءساۋىر 2015 | GMT +5
ەردوعان ەۋروپا ەلدەرىنە يران مۇنايىن جەتكىزۋگە جول اشۋى مۇمكىن
استانا. قازاقپارات - تۇركيا پرەزيدەنتى رەدجەپ تايىپ ەردوعان ەۋروپا ەلدەرىنە يران مۇنايىن جەتكىزۋگە جول اشۋى مۇمكىن.
بۇل تۋرالى شەتەل ساراپشىلارى جارىسا جازۋدا.
وعان تۇركيا پرەزيدەنتىنىڭ كۇنى بۇگىن يرانعا ىسساپارمەن بارۋى سەبەپ بولىپ وتىر.
رەدجەپ تايىپ ەردوعان يسلام رەسپۋبليكاسىنا رەسمي انكارا مەن تەگەران قارىم- قاتىناسىنا سوڭعى كەزدە سىزات تۇسۋىنە قاراماستان جول تارتتى. بۇعان دەيىن ول يرانعا «يەمەندەگى بۇلىكشى توپقا قولداۋ كورسەتىپ جاتىر» دەپ ايىپ تاققان بولاتىن. ال سوڭعى بىرنەشە جىل بويى ەكى ەل اراسىندا سيرياداعى شيەلەنىسكە بايلانىستى ءبىرقاتار كەلىسپەۋشىلىك تۋىنداعان ەدى. ءبىراق وسىنداي تۇيتكىلدەرگە قاراماستان، رەسمي انكارا مەن تەگەران اراسىنداعى ەكونوميكالىق بايلانىس نىعايماسا، السىرەگەن ەمەس.
ايتا كەتەيىك، يران - تۇركيانى تابيعي گازبەن قامتاماسىز ەتەتىن ەكىنشى ءىرى مەملەكەت.
www.24.kz
