قازاقستاندا بۇرىن- سوڭدى بولماعان اسكەري شەرۋ وتەدى
قازىر وعان ەلىمىزدىڭ قارۋلى كۇشتەرى قىزۋ دايىندالىپ جاتىر. ويتكەنى بيىل قازاقستاندا بۇرىن- سوڭدى بولماعان اسكەري شارا وتپەك. ۇزىندىعى 6,5 شاقىرىمعا سوزىلاتىن شەرۋگە بەس مىڭداي سارباز بەن 300 دەن استام تەحنيكا قاتىسادى.
اسكەري شەرۋگە ءبىر اي قالسا دا، ساربازداردىڭ بوساڭسۋىنا جول جوق. ءتورت قارۋىن سايلاپ جاتىر. ويتكەنى شەرۋدە سىپتاي بولىپ ساپقا تۇراتىن اسكەريلەرمەن بىرگە قارىم- قابىلەتى كۇشتى تەحنيكا دا ءجۇرىپ وتەدى.
اسكەري شارادا ماقتانىشقا اينالعان، قاۋقارى زور ءارى ۇتقىر- ۇتقىر زاماناۋي قارۋ- جاراقتار كورسەتىلەدى. وسىلايشا قارۋلى كۇشتەر ەل تىنىشتىعىن قامتاماسىز ەتۋگە، كەز كەلگەن قاۋىپكە تويتارىس بەرۋگە مۇمكىندىگىمىز بار ەكەنىن پاش ەتپەك.
ەركەبۇلان قاناتپيانوۆ، اسكەري قىزمەتكەر:
- س-200 جانە س-300 زىمىرانى - ەڭ مىقتى زىمىرانداردىڭ ءبىرى. ولاردىڭ مۇمكىندىگى وتە جوعارى. 1 سەكۋندتا 1-1,5 شاقىرىمدى باعىندىرادى. بۇلار ق ر اۋە كەڭىستىگىن قورعاۋعا ارنالعان.
تاعى ءبىر جاڭالىق. بيىلعى شەرۋگە ۇلى وتان سوعىسىنان قالعان تانكىلەر، پۋشكالار مەن ۇشاقتار قاتىسادى.
اسىلبەك ساتىبالدينوۆ، ق ر ق ك قۇرلىق اسكەرلەرى باس قولباسشىسىنىڭ ورىنباسارى:
- تاريحي ءبولىم بولادى. تانك ت-34، «كاتيۋشا»، «ماكسيم» پۋلەمەتتەرى، «موسين» ۆينتوۆكالارى بولادى. وتان سوعىسىنان قالعان ارتيللەريالىق پۋشكالار بولادى.
ۇلى جەڭىسكە قول جەتكىزگەن قارۋلار - وسى. جاۋدىڭ ساۋىتىن وتقا وراپ، جايراتقان تانكىلەر مەن پۋشكالار. ەندى ولار سۇراپىل سوعىستان سىر شەرتەتىن جادىگەرلەرگە اينالىپ وتىر. اتى اڭىزعا اينالعان قارۋ- جاراقتى ءسىز بەن ءبىز مامىردىڭ 7- كۇنى وتەتىن اسكەري شەرۋدە كورە الامىز.
بۇل قازاقستاندا بۇرىن- سوڭدى بولماعان اسكەري شەرۋ بولادى. بەس مىڭداي اسكەري قىزمەتكەر مەن 220 دان استام اسكەري تەحنيكادان قۇرالعان ساپ 6,5 شاقىرىمعا سوزىلادى. شارانىڭ تاعى ءبىر ەرەكشەلىگى سول 85 اۋە كەمەسىنىڭ قاتىسۋىمەن ۇلكەن اۆيا شوۋ ۇيىمداستىرىلادى. ۇشاقتار مەن تىكۇشاقتاردىڭ كوك اسپاندا 70 دەگەن ساندى جازۋى جوسپارلانعان.
