قازاقتىڭ تۇڭعىش گەنەرالى شاكىر جەكسەنبايەۆ سوعىس جىلدارى حيميالىق قورعانىس ءبولىمىن باسقارعان
ال، سوعىس جىلدارى پولكوۆنيك جەكسەنبايەۆ باسىندا باتىس، كەيىن ورتالىق باعىتتاعى حيميالىق قورعانىس اسكەرلەرىن، 3- بريانسك اسكەرى مەن وڭتۇستىك- باتىس مايداننىڭ حيميالىق قورعانىس ءبولىمىن باسقارعان. سول كەزەڭدە حيميالىق قورعانىس باتالونىنا ارميانى باقىلاۋ، قارسىلاستىڭ حيميالىق شابۋىلىنا تويتارىس بەرۋ جانە ونىڭ سالدارىن شۇعىل تۇردە جويۋ تۋرالى ماڭىزدى جاۋىنگەرلىك مىندەت جۇكتەلگەن ەدى.
جاۋدى تالقانداۋ ماقساتىندا مايداندا شاكىر جەكسەنبايەۆ قوپارعىش وتتى قارۋلى بىرنەشە روتا قۇرعان. شابۋىلدى وپەراتسيالاردىڭ اياعىندا اتالعان روتالاردىڭ كومەگىمەن جاۋ ارمياسىنىڭ توعىز تانكى جانە 1 مىڭنان اسا جاۋىنگەرى جويىلعان. سونىمەن قاتار، وفيتسەر بىرنەشە ۇرىستاردى جەكە باسقارا وتىرىپ، سەگىز شاقىرىمعا دەيىن ءتۇتىن جىبەرگەن. سونىڭ ناتيجەسىندە اسكەر ايتارلىقتاي العا جىلجىپ، جاۋدى كەرى قايتۋعا ماجبۇرلەگەن. جاۋمەن ۇدايى ۇرىس جۇرگىزىپ جاتقان نەگىزگى ارميانىڭ جاۋىنگەرلەرىنە حيميالىق قورعانىس اسكەرلەرى كومەك كورسەتكەن.
ماسكەۋ تۇبىندەگى، ستالينگراد جانە ورلوۆسك- كۋرسك دوعاسىندا فاشيستەردى تالقانداعاننان كەيىن حيميالىق قورعانىس باتالونى پريبالتيكالىق مايدانعا جونەلتىلدى.
1943 - جىلدىڭ قازان ايىندا شاكىر جەكسەنبايەۆقا تەحنيكالىق اسكەرلەردىڭ گەنەرال- مايورى اتاعى بەرىلىپ، 1- دارەجەلى «1941-1945 ج ج. ۇلى وتان سوعىسى» وردەنى تابىس ەتىلدى. 1944 - جىلدىڭ اقپان ايىندا بۇكىل پريبالتيكالىق رەسپۋبليكالار جاۋ ارمياسىنىڭ قۇرساۋىنان بوساتىلىپ، شىعىس گەرمانيا ايماعىندا جاۋىنگەرلىك وپەراتسيالار باستالعان. سونداي وپەراتسيالاردىڭ ءبىرىن اياقتاعاندا تەحنيكالىق اسكەرلەردىڭ گەنەرال- مايورى جەكسەنبايەۆ جاۋىنگەرلىك قىزمەتى ءۇشىن «لەنين» وردەنىمەن، ال ءبىراز ۋاقىتتان كەيىن « قىزىل جۇلدىز» وردەنىمەن ماراپاتتالعان.
1945 -جىلى فاشيستىك گەرمانيانى ءبىرجولا جەڭىپ، ماسكەۋدەگى قىزىل الاڭدا وتكەن جەڭىس پارادىندا حيميالىق قورعانىس اكادەمياسىنىڭ لەگىن قازاقتىڭ تۇڭعىش گەنەرالى شاكىر جەكسەنبايەۆ باستاپ ءوتتى. سوعىستان كەيىن گەنەرال حيميالىق قارۋلار مەن قۇرلىق اسكەرلەرىن جابدىقتاۋمەن اينالىستى. 1960 - جىلداردىڭ ورتاسىندا زاپاسقا شىعىپ، «سوعىس قاسىرەتى» اتتى كىتابىن شىعاردى. كىتاپتا قاسىرەتتى سوعىس جىلدارىن بايانداي وتىرىپ، جاس بۋىندى بەيبىتشىلىكتى قاستەرلەۋگە جانە ونى قانداي دا جاعداي بولماسىن ساقتاپ قالۋعا شاقىرعان.
