قازاقستاندا جۇردەك پويىزدارعا يكەمدى باعا بەلگىلەۋ جۇيەسى ەنگىزىلەدى

 بۇل باعدارلاما بيلەتتى ساتىپ الۋدىڭ نەعۇرلىم ۇزاق مەرزىمى (ساتىلىمنىڭ تەرەڭدىگى) مەن وعان دەگەن سۇرانىسقا (پويىزدىڭ قانشالىقتى تولۋىنا) قاراي وزگەرىپ وتىرادى. ماسەلەن، بيلەتتى الدىن الا ساتىپ العان جولاۋشى بيلەتتىڭ بازالىق باعاسىنان 35 پايىزعا دەيىن جەڭىلدىككە يە بولا الادى.

پويىزدىڭ ءجۇرۋ ۋاقىتى جاقىنداعان سايىن بيلەت باعاسىنىڭ وسە تۇسەتىنىن دە ايتا كەتۋ كەرەك.

سونداي- اق، تاريفتى باسقارۋدىڭ يكەمدى باعدارلاماسى تومەندەگى «تۇلپار- تالگو» پويىزدارىنا دا ەنگىزىلگەن: 19/20 استانا- اتىراۋ، 35/36 الماتى- شىمكەنت №49/50 «الماتى- اقتوبە» ، №67/68 «استانا- زاشيتا («وسكەمەن» ) ، №69/70 «الماتى- زاشيتا («وسكەمەن»)، №77/78 «الماتى- اتىراۋ»، №79/80 «استانا- شىمكەنت»، №87/88 «اقتوبە- استانا»، №89/90 «استانا- قىزىلوردا».

مۇمكىندىكتەرى شەكتەۋلى ادامدار مەن ولاردى ەرتىپ جۇرگەن تۇلعالارعا اتالمىش باعدارلاما جۇرمەيدى، مۇنداي ارنايى ورىندارعا بازالىق تاريفتىڭ 50 پايىزى كولەمىندە جەڭىلدىكتەر قاراستىرىلعان.

بۇدان بولەك ءاربىر ساناتتاعى جولاۋشىلارعا 10 پايىزدان 20 پايىزعا دەيىن جەڭىلدىكتەرى بار كەلەسى ديسكونتتىق كارتالار قاراستىرىلعان:

«قۇرمەت» - 60 جاس پەن ودان ەرەسەك ادامدار ءۇشىن، جەڭىلدىك كولەمى - 10%؛

«جاستار» - 16-25 جاس ارالىعىنداعى جاستار ءۇشىن، جەڭىلدىك كولەمى - 10%؛

«ساياحاتشى» - جۇردەك پويىزداردا سوڭعى 12 ايدا تومەندەگىدەي باعاعا ساپارلاعان تۇراقتى جولاۋشىلار ءۇشىن:

*  100000 تەڭگەدەن  150000 تەڭگەگە دەيىن، جەڭىلدىك كولەمى - 10 پايىز؛

*  150001 تەڭگەدەن  200000 تەڭگەگە دەيىن، جەڭىلدىك قۇنى - 15 پايىز؛

*  200001 تەڭگەدەن جوعارى، جەڭىلدىك كولەمى - 20 پايىز.