اتاقتى اكتەر چىڭ لۇڭ الپىس ءبىر جاسقا اياق باستى - فوتو

 استانا. قازاقپارات - ميلليونداعان كورەرمەننىڭ جۇرەگىن جاۋلاپ، كينو الەمىندە وزىندىك قولتاڭباسىن قالدىرعان اتاقتى قىتايلىق اكتەر دجەكي چان بۇگىن الپىس ءبىر جاسقا اياق باستى.

 وسى قۋانىشتى سىزدەرمەن بولىسە وتىرا، «الىپ» اكتەر جايلى قىسقاشا دەرەكناما بەرۋدى ءجون كوردىك.

دجەكي چان (چىڭ لۇڭ)- الەمدىك دەڭگەيدە بويەۆيك جانرىندا تۇسىرىلگەن كوپتەگەن كينونىڭ قاھارمانى. ول وزگەلەردەن ءوزىنىڭ كومەديالىق دارىنىمەن، ۇرىس ونەرىمەن دارالانادى. جۇزدەگەن  فيلمنىڭ باستى كەيىپكەرىن سومداپ، الەمگە ايگىلى ازيالىق ءارتىس اتانعان. ارتىستىك قابىلەتىنەن بولەك، انشىلىك قىرىمەن دە تانىلعان دجەكي ناعىز سەگىز قىرلى، ءبىر سىرلىنىڭ ءوزى. 1980 -جىلدان باستاپ، بۇگىنگە دەيىن 20 عا جۋىق ءان- جيناعى شىعارىلعان. جانە دە كوپتەگەن كينوسىنداعى نەگىزگى اندەردى ءوزى ورىندايدى. ەندەشە، ءبارىمىز بىرگە مىنا سۇراققا جاۋاپ ىزدەپ كورەيىك: دجەكي چاندى تانىمال قىلعان كىم، وسى اتاققا قالاي يە بولدى؟

 دجەكي چان 1954 - جىلى   7  - ءساۋىر  كۇنى كەدەي وتباسىندا دۇنيەگە كەلگەن. اتا- اناسى جاي عانا كەدەي ەمەس، بالا اسىراماق تۇگىلى، ءوز قولدارى وزدەرىنە ارەڭ جەتىپ جۇرگەندىكتەن، جاڭا تۋعان چاندى دارىگەرگە ساتىپ جىبەرۋگە دە از قالعان ەكەن.

دەگەنمەن، ءبىراز ۋاقىتتان كەيىن ولار اۋستراليانىڭ ا ق ش ەلشىلىگىندە اسپازشى بولىپ، قىزمەتكە تۇرادى. دجەكي التى جاسقا كەلگەندە، اتا- اناسى گونكونگتەگى پەكين وپەرا مەكتەبىنە وقۋعا بەرەدى. اتالعان مەكتەپ سول كەزدەگى گونكونگتىڭ بەدەلدى مەكتەپتەرىنىڭ ءبىرى ەدى. مۇندا وقۋشىلارعا اكتەرلىك شەبەرلىكپەن قاتار، ءان ايتۋ، اكروباتيكا ونەرى، ءبي جانە ۇرىس ونەرىن ۇيرەتكەن. دجەكي وسى مەكتەپتىڭ قابىرعاسىندا العان ءبىلىمى مەن تاربيەسى بۇگىنگە دەيىن ومىرلىك ازىق بولىپ كەلە جاتقانىن العا تارتادى. وعان قوسا، ۇلكەن ونەردىڭ باستاۋى بولعان كۋنگ- فۋدى دا وسى جەردەن ۇيرەنگەن ەكەن. ءوزىنىڭ قارىمى مەن دارىنىڭ ارقاسىندا 8-10 جاسىنان- اق كوپشىلىك كورىنىستەردە (ماسسوۆكا) ويناعان. ءبىراق، بالالىق شاعىندا «ۇلكەن مۇرىن» اتانعان دجەكيدىڭ بولاشاقتا "ۇلكەن ازامات" بولاتىنىن ەشكىم دە اڭعارماعان ەدى.

ال 1971 - جىلى مەكتەپتى ءتامامداعان سوڭ، كينو الەمىندەگى ءوز مانسابىن كاسكادەر بولىپ باستايدى. كۋنگ- فۋ، اكروباتيكا ونەرىن «بەس ساۋساقتاي» يگەرگەن ءارى ەرەكشە ارتىستىك قابىلەتكە يە دجەكي تەز تانىلادى.

ول العاش "قىران كولەڭكەسىندەگى جىلان" ( Snake in the Eagle's Shadow ) ، "ماس شەبەر" ( DRunken Master) سىندى فيلمدەرگە تۇسكەن ەكەن. وسىدان كەيىن، گونكونگتە قالاماقىسى قىمبات ءارتىس رەتىندە تانىلعان. ءوزىن- ءوزى دامىلسىز دامىتۋىنىڭ ارقاسىندا، سەناري جازىپ، رەجيسسەرلىك قابىلەتىمەن كوزگە تۇسەدى. ونى باسقالاردان بولەكتەپ تۇراتىن تاعى ءبىر نارسە: فيلمدەرىندەگى تريۋكتاردى ەشكىمنىڭ كومەگىنسىز ءوزى سومدايدى.

 

 تالانتىمەن ازيانى باعىندىرعان دجەكي ەندى امەريكاعا بارىپ، جاڭا بەلەستەردى باعىندىرۋدى ارمانداعان. امەريكاعا بارا سالا، ءبارى ويداعىداي بولعان جوق. كوپتەگەن قيىنشىلىققا تاپ بولعان. تەك امەريكاداعى مانسابى 1995 - جىلى تۇسىرىلگەن "برونكستەگى ءدۇرسىل" ("Rumble in the Bronx") اتتى فيلمىنەن كەيىن كوتەرىلگەن.

 

 دجەكي چان ءازىل- قالجىڭىمەن كورەرمەندەرىنە كوڭىل- كۇي سىيلاپ، قۋانتىپ كەلەدى. كورەرمەندەرى ونىڭ جاڭا فيلمدەرىن ۇلكەن- كىشى بولىپ اسىعا كۇتەدى. بويىنا بىتكەن ەرەكشە قابىلەتى مەن تالانتىنىڭ ارقاسىندا ولاردىڭ جۇرەگىن جول تابا بىلەدى. تەك كورەرمەندەردىڭ عانا ەمەس، مۇمكىندىگى شەكتەۋلى جانداردىڭ دا جۇرەگىنە ءۇمىت سىيلاپ، ولارعا ۇنەمى قامقور بولىپ جۇرەدى. ول تۋرالى ءتۇرلى كىتاپ جارىق كوردى. سونىمەن قاتار، گونكونگتەگى جۇلدىزدار داڭعىلىندا جانە گولليۆۋدتاعى جۇلدىزدار اللەياسىندا دجەكي چاننىڭ جۇلدىزى بار. تالانتى مەن قابىلەتىنىڭ ارقاسىندا تاريحتا اتى جازىلعان ءارتىستىڭ شىعارماشىلىعىنا الەم جۇرتى ءتانتى.

  ءسوز سوڭىندا ايتارىمىز، دجەكي چاندى تانىمال قىلىپ، اتاعىن التى ماتەريككە جايعان -  تەك قانا ءوزى جانە ءوزىنىڭ كۇش- جىگەرى مەن تەمىردەي ءتوزىمى.

massaget.kz