مۇنايعا ەكسپورتتىق كەدەندىك باج سالىعىنىڭ دەڭگەيى مامىردا قاراستىرىلۋى مۇمكىن - د. ەرعوجين

استانا. قازاقپارات - قازاقستاندا مۇنايعا ەكسپورتتىق كەدەندىك باج سالىعىنىڭ دەڭگەيى مامىردا قاراستىرىلۋى ىقتيمال.

 بۇل تۋرالى بۇگىن استانادا سالىقتىق جانە كەدەندىك اكىمشىلەۋدى جەتىلدىرۋگە ارنالعان «دوڭگەلەك ۇستەلدە» ق ر قارجى مينيسترلىگىنىڭ مەملەكەتتىك كىرىستەر بويىنشا كوميتەتىنىڭ ءتوراعاسى داۋلەت ەرعوجين ءمالىم ەتتى.

«شىنىمەن دە قازىرگى كەزدە مۇناي باعاسى قۇبىلمالى، ياعني اپتا سايىن وزگەرۋدە. بىردە تومەندەسە، بىردە كوتەرىلىپ جاتىر. سوندىقتان دا ءبىرجاقتى شەشىم جاساپ، قازىر ستاۆكانى نولدەۋ تۋرالى ايتۋ ەرتەرەك. وسى ورايدا ءبىرىنشى توقساننىڭ قورىتىندىسى بويىنشا الداعى بىرنەشە ايدا ارى قاراي جىلجۋدىڭ باعدارىن زەردەلەۋ كەرەك»، - دەدى كوميتەت باسشىسى.

 ونىڭ ايتۋىنشا، تۇزەتۋلەر جازعا قاراي ورىن الۋى مۇمكىن، ياعني بۇل تۇرعىدا جىلدىڭ سوڭىنا دەيىن بولجام جاساۋعا بولادى.

«وسى ورايدا شامامەن مامىردا بولجام جاساپ، ستاۆكالاردىڭ مولشەرى تۋرالى ءسوز قوزعاۋعا بولادى. ال قازىرگى كەزدە (مۇنايعا ەكسپورتتىق كەدەندىك باج سالىعىن تومەندەتۋ) ەرتەرەك، سەبەبى قىسقى كەزەڭدە مۇنايدى تۇتىنۋ سۇرانىسى جاقسى دەڭگەيدە. جازعى پايدالانۋ دەڭگەيى نەگىزىنەن تومەندەيدى. سوندىقتان دا تۇزەتۋلەردى مامىردا قاراستىرۋىمىز ىقتيمال»، - دەدى ەرعوجين.

 ەستەرىڭىزگە سالا كەتەيىك، جاقىندا قازاقستاندا مۇنايدىڭ ءبىر تونناسىنا ەكسپورتتىق باج سالىعى 80 دوللاردان 60 دوللارعا تومەندەتىلدى.

اۆتور: رۋسلان عابباسوۆ