قازپوشتا باسشىسى ءوزىنىڭ جالاقىسى نەلىكتەن جوعارى ەكەنىن ايتتى

استانا. قازاقپارات - بۇگىن ورتالىق كوممۋنيكاتسيالار قىزمەتىندەگى بريفينگتە «قازپوشتا» ا ق باسقارما ءتوراعاسى باعدات مۋسين كومپانيانىڭ ديرەكتورلار كەڭەسىنە ءوزىنىڭ جالاقىسىن قىسقارتۋ تۋرالى ۇسىنىس جاساعاندىعىن ءمالىم ەتتى.

«جالاقىنىڭ ايىرماشىلىعىنا توقتالاتىن بولسا، ءبىزدىڭ سالادا ونىڭ ايىرماشىلىعى جوعارى. وسى ورايدا ءبىز (باسشىلىق) جالاقىنى تومەندەتۋ تۋرالى ۇسىنىسپەن شىقتىق. كەڭەس تاراپىنان «ەگەر دە وسى قادام قابىلدانعان جاعدايدا قانشا قارجى ۇنەمدەلەدى؟ » دەگەن ساۋال قويىلدى. ەسەپتەۋلەر بارىسىندا 0,01 پايىز كولەمىندە بيۋدجەتتەن قارجى ۇنەمدەلەتىنىن ايقىندادىق. وسى ورايدا باسشىلىقتىڭ جالاقىسىن تومەندەتكەننەن ەشقانداي ناتيجە بولمايتىنى ايتىلدى. بۇل تۇرعىدا ديرەكتورلار كەڭەسى ءبىزدىڭ الدىمىزعا تابىستىڭ جاڭا كوزدەرىنە ءمان بەرۋدى جۇكتەدى. سونىمەن قاتار ولار وسىنداي كوتەرىڭكى جالاقىسى بىزگە جوعارى تالاپتار قويىلعاندىقتان بەلگىلەنگەنىن اتاپ ءوتتى» ، - دەدى ب. مۋسين.

ونىڭ ايتۋىنشا، «قازپوشتادا» 22 مىڭ ادام قىزمەت ەتەدى، ونىڭ 50 پايىزى - اۋىلدىق جەرلەردە. قىزمەتكەرلەردىڭ جالاقىسىن كوتەرۋ ءۇشىن «قازپوشتانىڭ» تابىسىن ارتتىرۋ كەرەك.

«وتكەن جىلمەن 2013 -جىلدى سالىستىراتىن بولساق، بىلتىر ءبىز 2,5 ميلليارد تەڭگە ارتىق كىرىس جاسادىق. وسى قارجىنىڭ ىشىندە وندىرىستىك قىزمەتكەرلەردىڭ ەڭبەگىن تولەۋ قورىن وسىرۋگە 2,2 ميلليارد تەڭگە باعىتتالدى. ياعني، نورمانىڭ ۇستىندەگى تابىستىڭ 95 پايىزىن وندىرىستىك قىزمەتكەرلەردىڭ ايلىعىن ارتتىرۋعا جۇمسادىق. بۇل تۇرعىدا اكىمشىلىك قىزمەتكەرلەر قامتىلعان جوق» ، - دەدى ول.

ەستەرىڭىزگە سالا كەتەيىك، بۇدان بۇرىن Nur.kz پورتالىنا بەرگەن سۇحباتىندا باعدات مۋسين «قازپوشتا» ا ق باسقارما ءتوراعاسى رەتىندە جالاقىسى 1,5 ميلليون تەڭگە ەكەنىن ايتقان بولاتىن. سالىقتىق تولەمدەر ۇستالعاننان كەيىن قولىنا 1,2 ميلليون تەڭگە الادى ەكەن.

 

 اۆتور: رۋسلان عابباسوۆ