ەلوردادا ارنايى رۇقساتى جوق، ءوز ىسىنە جاۋاپسىز قۇرىلىسشىلار بار - استانا اكىمى
بۇل تۋرالى بۇگىن ەلوردالىق كاسىپكەرلەر كونفەرەنسياسىندا استانا اكىمى ادىلبەك جاقسىبەكوۆ ايتتى.
«قازىرگى ۋاقىتتا ءبىز ليتسەنزياسىز جۇمىس ىسەيتىن، ءوز ىسىنە جاۋاپسىز قارايتىن ءبىرقاتار قۇرىلىس كومپانيالارىن بىلەمىز. ولار ۇلەسكەرلىك قۇرىلىس تۋرالى زاڭدى قاپەرگە الماستان باسپانالاردى ساۋدالاۋدا»، - دەدى قالا باسشىسى.
وسى رەتتە ءا. جاقسىبەكوۆ بۇل ماسەلەنىڭ ءتۇيىنىن تارقاتۋعا ۇلتتىق كاسىپكەرلەر پالاتاسى دا قاتىسۋى تيىستىگىن باسا ايتتى.
«مۇنداي ءوز ىسىنە جاۋاپسىز قارايتىن قۇرىلىسشىلار بيزنەستىڭ بەدەلىن تۇسىرەدى. ءتىپتى، بەلگىلى ءبىر دەڭگەيدە ازاماتتاردىڭ الەۋمەتتىك نارازىلىعىن تۋىنداتادى. ولار ءوز بەتتەرىمەن قۇرىلىستى باستاپ، اقشا جيناپ الادى. وسىدان كەيىن ولار ءوز مىندەتتەرىن ورىندامايدى. ياعني، ازاماتتاردىڭ ەكونوميكالىق مۇددەسىنە نۇقسان كەلتىرەدى»، - دەپ اتاپ ءوتتى ەلوردا اكىمى.
اۆتور: مارلان جيەمباي
