تالدىقورعان تۇرعىنى بايان ەسەنتايەۆادان فيلمنىڭ يدەياسى ءۇشىن كولەمدى سىياقى تالاپ ەتتى
بايان ەسەنتايەۆانىڭ ايتۋىنشا، رينات كارىموۆ دەگەن ازامات «تراكتورشىنىڭ ماحابباتى» فيلمىنىڭ اۆتورلىعىنان ۇمىتتەنىپ، ونى بىرنەشە ايدان بەرى قورقىتىپ كەلەدى. ەسەنتايەۆا پوليتسياعا ارىزدانىپ تا قويدى.
بايان ەسەنتايەۆانىڭ سوزىنە قاراعاندا، تالدىقورعاندىق جاس جىگىت ونىڭ ۇيالى تەلەفونىنا حابارلاما جىبەرىپ قانا قويماي، قازاقستاندىق ب ا ق- قا دا بارعان. «ول مەنى «تراكتورشىنىڭ ماحابباتى» فيلمىنە ونىڭ يدەياسىن ۇرلاپ الدى دەپ ايىپتايدى، بۇل بارىپ تۇرعان ساندىراق. كارتينانىڭ اۆتورى اسقار ۇزابايەۆ، بۇل ءفيلمدى سول ويلاپ تاپتى. (...) مەن بۇل رينات كارىموۆتى ول ايتىپ وتىرعانداي، ومىرىمدە كورگەن دە، تەلەفونمەن دە، WhatsApp-پەن دە سويلەسكەن ەمەسپىن. ونىڭ ايتۋىنشا، مەن وعان ۋادە بەرىپپىن.
ول ماعان كۇندە جازىپ، Audi ماركالى اۆتوكولىك پەن اقشا تالاپ ەتەدى (...). بۇدان بولەك، ول اقپارات قۇرالدارىنا شاعىمدانىپ، جۋرناليستەر ونىڭ سوزىنەن الىپ، راستالماعان اقپاراتتى جاريالاعان. قالايشا بۇلاي ىستەۋگە بولادى؟ - دەيدى بايان ەسەنتايەۆا.
- مەن مۇنى جالا دەپ ەسەپتەيمىن جانە بۇل ءۇشىن قىلمىستىق جاۋاپكەرشىلىك بار، مەن قۇقىق قورعاۋ ورگاندارىنا شاعىمداندىم جانە بوپسالاۋشىنى جازالاۋعا نيەتتىمىن»، - دەدى ول.
بۇعان دەيىن تالدىقورعان تۇرعىنى Nur.kz پورتالىنا سۇحبات بەردى. جىگىتتىڭ ايتۋىنشا، ونىڭ اناسى ناۋقاس جانە ماتەريالدىق جاعدايلارى تومەن.
كارىموۆ 2012 - جىلى بايان ەسەنتايەۆاعا قىزىق وقيعانى ايتىپ بەرگەنى جايلى اڭگىمەلەدى، جاس جىگىتتىڭ ايتۋىنشا، سول وقيعا «تراكتورشىنىڭ ماحابباتى» فيلمىنە نەگىز بولعان.
«كەيىپكەرلەر مەن سيۋجەت - مەنىڭ يدەيام. وعان مەنىڭ اڭگىمەم ۇنادى. بايان ەسەنتايەۆا تابىستىڭ 30 پايىزىن بەرەمىن دەپ ۋادە ەتتى، ءبىراق ولاي ىستەمەدى، - دەدى رينات.
- اۆتورلىق قۇقىقتى راسىمدەيىن دەپ قوڭىراۋ شالعانىمدا، ول تەلەفونىن كوتەرمەيتىن بولدى. ءفيلمنىڭ جالعاسى بار (...) مەن ونىڭ نەمەن اياقتالۋى ءتيىس ەكەنىن بىلەمىن. ەگەر بايان ەسەنتايەۆا تولەسە، مەن سيۋجەتىممەن بولىسەمىن»، - دەدى كارىموۆ. الايدا جاس جىگىت راسىندا دا تانىمال پروديۋسەرمەن سويلەسىپ، قىزمەتتەس بولۋعا كەلىسكەنىن دالەلدەيتىن ەشتەڭە كورسەتە المادى.
ەسكە سالا كەتەيىك، «تراكتورشىنىڭ ماحابباتى» رومانتيكالىق كومەدياسى 2013 -جىلى ەكرانعا شىقتى - وعان بايان ەسەنتايەۆا مەن بەرىك ايتجانوۆ ءتۇستى. ءفيلمنىڭ ءموتيۆى بويىنشا تەلەحيكايا دا ءتۇسىرىلدى. ول قازاقستاندىق تەلەارنالاردىڭ بىرىنەن كورسەتىلدى. سەناريىن اسقار ۇزابايەۆ پەن دانيار كۇمىسبايەۆ جازدى.
