قازاقستان عالامشاردىڭ تۇراقتى دامۋىن تالقىلاۋعا الەمنىڭ ءۇش مىڭ ۋنيۆەرسيتەتىن بىرىكتىرمەك

استانا. قازاقپارات - الەمدە تۇراقتى دامۋ ماسەلەسىن تالقىلاۋ ءۇشىن قازاقستان G- Global كوممۋنيكاتيۆتى الاڭىندا دۇنيە ءجۇزىنىڭ ءۇش مىڭنان استام وقۋ ورنىن بىرىكتىرۋگە نيەتتى.

بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە ق ر پارلامەنتى سەناتىنىڭ دەپۋتاتى، «عالىمداردىڭ ەۋرازيالىق ەكونوميكالىق كلۋبى» قاۋىمداستىعى ۇيلەستىرۋ كەڭەسىنىڭ تەڭ ءتوراعاسى سەرىك نوگەربەكوۆ ءمالىم ەتتى.

G- Global تۇعىرناماسىندا ارنايى ايدار بار ەكەنىنە جانە ونى ءار كەزەڭدە نوبەل لاۋرەاتتارى مەن حالىقارالىق ءىرى ۇيىمداردىڭ جەتەكشىلەرى جۇرگىزگەندىگىنە توقتالعان ول الداعى ەكى ايدا بۇل ايدارداعى تۇلعا رەتىندە ءال-فارابي اتىنداعى قاز ۇ ۋ رەكتورى، اكادەميك ع. مۇتانوۆ بولاتىندىعىن جەتكىزدى.

«مۇتانوۆ مىرزا العا جىلجىتاتىن تاقىرىپ G- Global تۇعىرناماسىندا ءبىزدىڭ عالامشاردىڭ تۇراقتى دامۋىنا بايلانىستى. ونىڭ جوسپارىندا اتالعان تاقىرىپتى تالقىلاۋعا الەمنىڭ ءۇش مىڭعا جۋىق ۋنيۆەرسيتەتىن جۇمىلدىرۋ بار. اتاپ ايتقاندا، الەمدەگى جوعارى وقۋ ورىندارىنىڭ وقىتۋشىلارى مەن ستۋدەنتتەرى بۇل تاقىرىپ بويىنشا پىكىر الماسادى. سەبەبى، تۇراقتى دامۋ G- Global ماقساتتارىمەن تولىق سايكەس كەلەدى»، - دەپ اتاپ ءوتتى س. نوگەربەكوۆ.

سونىمەن قاتار ول مامىردىڭ اياعىندا G- Global كوممۋنيكاتيۆتى تۇعىرناماسىندا ونلاين- رەجىمدە حالىقارالىق ءىرى كونفەرەنتسيا وتكىزىلىپ، وندا اتالعان جۇمىستىڭ قورىتىندىلارى جاسالاتىنىن اتاپ ءوتتى.

اۆتور: رۋسلان عابباسوۆ